 |
| Foto de Presidência da República de Timor-Leste, Facebook |
Prezidente Republika (PR), Taur Matan
Ruak, husu ba governante sira labele iha deit vila laran maibe tenki
hakbesik-an ba povu iha baze hodi rona preokupasaun no difikuldades
ne’ebé maka povu sira infrenta nune’e bele hadiak sira nia moris.
Tuir PR Taur katak, Governante tenki
hakbesik an ba povu atu nune’e povu bele hatene akontesementu saida mak
lao los iha nasaun ida ne’e ao mesmo tempo fo informasaun ba povu sira.
“Ukun ne’e presiza iha buat rua ne’ebé
di’ak. Buat ne’ebé ita presiza halo maka hakbesik-an ba povu ne’ebé maka
hanesan dadauk ha’u halo ne’e no hadia ekonómia mak buat ne’ebé presiza
halo ba iha dezenvolvimentu”, dehan PR Taur iha dialogu komunitáriu
ne’ebé halo ho komunidade Suku Dare, iha Salaun Casa Retiro Dare-Dili.
Segunda (11/8) horiseik.
PR Taur Matan Ruak hateten, liu husi
dialogu ne’e husu atu komunidade sira kontinua hametin relasaun diak
hodi kontribui nafatin ba dezenvolvimentu nasaun ninian, tanba
dezenvolvimentu presiza kontribuisaun sidadaun hotu nian. Atu muda
ekonómia iha rai laran presiza mós kontribuisaun husi komunidade inkliu
mós ukun nain sira presiza hakbesik-an ba komunidade atu bele hametin
relasaun diak.
Xefe Estadu ne’e durante halo vizita
hala’o suku sira iha Timór laran tomak atu bele hakbesik-an ba Iha povu
maski la muda povu nia moris, maibé tau hanoin hamutuk hodi dezenvolve
ekonómia iha rai Laran.
Tanba ne’e husu ba komunidade sira atu
bele kontiribui nafatin ba iha dezenvolvimentu nasionál no hakbesik-an
ba iha ukun-nain sira hanesan iha tempu luta ba ukun rasik-an.
Eis Gerileiru ne’e dehan, dalan ba iha
dezenvolvimentu nasaun ninian presiza kontribuisaun husi sidadaun hotu
no presiza hametin relasaun ne’ebé di’ak entre sidadaun hotu.
Alen de ne’e, PR Taur mós husu ba
komunidade sira atu kontinua servisu hamutuk ho lideres local liu-liu
Xefe Aldeia, Xefe Suku, Adiministrador sira atu nune’e bele hamutuk
hala’o dezenvolvimntu iha suku laran.
PR Taur husu komunidade sira fo
kontribuisaun partisipa iha servisu públiku sira ne’ebé maka xefe suku
fo orientasaun hodi hala’o relativamente ba iha prosesu dezenvolvimentu
nasional.
“Imi (komunidade) tenki fo
kontribuisaun, wainhira xefe suku sira bolu halo servisu ruma hotu-hotu
hamriik dala ida tamba ita hotu hamutuk maka foin bele,”tenik PR Taur.
Xefe Estadu hatutan, komunidade tenki fo
fiar ba xefe aldeia, xefe suku, administrador sira tamba autoridade
local sira ne’e maka reprezenta Prezidente ne’ebé besik liu komunidade
hodi apoiu hala’o dezenvolvimentu iha suku sira teritoriu timor laran
tomak.
“Sira (xefe aldeia, suku, administrador)
reprezenta Prezidente tamba ne’e imi (komunidade-red) servisu hamutuk
ho sira ba dezenvolvimentu iha suku nian,”dehan PR Taur. Nune’e mós,
Xefe Estadu mós kestiona kona ba programa projetu dollar tolu (3) ne’ebé
maka antes ne’e governu liu husi Sekretariu Estadu Politika Formasaun
Profesional (SEPFOPE) fo tamba muda komunidade sira nia mentalidade
garante ba dollar tolu no halo komunidade sai baruk ten.
Projetu dollar tolu (3) halo komunidade
la fiar xefe suku tamba atu hala’o aktividade ruma iha suku laran
presiza dollar 3 wainhira laiha komunidade sira tur haree deit no sei la
servisu hamutuk fo kontribuisaun ba dezenvolvmentu iha suku nian.
“Projeitu 3 dollar ne’e labele tamba halo komunidade sira sai baruk ten.
Halo servisu kiik boot komunidade ejiji dollar 3, se laiha dollar 3
komunidade lakohi servisu,”hateten Taur.
Durante iha dialogu ne’e komunidade sira kontente no antisiasmu hodi partisipa iha dialogu komunitaria ne’e.dgx
,
Sem comentários:
Enviar um comentário
Nota: só um membro deste blogue pode publicar um comentário.