“Uza Karreta Estadu Ba Interese Partidaria, Eis Deputada Gertudis Arguida Iha TDD”

.

Jornal Independente - Tersa-feira, 15 Julli 2014

Uza kareta estadu ba interese privadu hodi halo kampania eleitoral iha tinan 2012, halo eis deputada husi Partidu Demokratiku (PD) Gertudis Moniz de Araujo segunda horsehik tenke sai arguida hodi ba hataan iha Tribunal Distrital Dili (TDD).

Tanba deskonfia uza karreta Parlamentu Nasional (PN), ba aprtisipa atividade kampania eleitoral iha tinan 2012. Tuir akuzasaun ne’ebe lee sai husi Juis Singular Antoninho Gonsalves katak, arguida hanesan deputada iha fulan-Jullu tiinan 2012 deputada uza kareta Parlamentu ho Numeru matrikula 88-34 ba tuir kampania eleitoral.

Arguida hatene kareta ne’e estadu nian atu uza ba servisu la’os ba interese privadu, tuir rezime PN mos bandu deputadu sira uza kareta ne’e ba sira nia interese privadu.

Ho arguida nia hahalok ne’e Ministeriu Publiku (MP) akuza komete krime pekulatu ho uzu ne’ebe regula iha artigu 296 kodigu penal Timor-Leste. Hafoin rona tiha akuzasaun, arguida hili dalan nonok, hodi lakohi fo deklarasaun ba Tribunal.

Tan ne’e, Tribunal rona kedas testamunha Faustino Cardozo Eis Prezidente Comisaun Nasional eleisoens (CNE) katak, CNE nia kompetensia atu halo supervizaun ba aktu eleitoral hotu inklui kampania eleitoral no prinsipiu ne’ebe konstituisaun atuur ona.

CNE mos iha estrutura ne’ebe estabelese iha Distritu hotu iha pessoal ne’ebe apoiu nesesidade media atu tau matan ba kampania hotu. Depois sira halo relatoriu mai iha CNE nasional, mak CNE nasional halo fali analiza ba relatoriu husi Distritu hotu ne’e, depois CNE renunsia prosesu ne’e ba Ministeriu Publiku (MP), bazeia ba relatoriu Distritu nian.

Kona ba invoolvimentu arguida nian, testamunha Faustino Cardoso lahatene tanba liu ona tinan 2 nia haluha ona. Audesia julgamentu ne’e prezidi husi Juis Singular Antonio Goncalves, Ministeriu Publiku (MP) reprejenta husi prokuradoria Gloria Alves no arguida hetan asistensia legal husi advogadu Pedro Aparicio, audensia julgamentu ne’e adia fali ba loron 21 fulan-Jullu ruku 18:00 lokarik oras TL.

.