“Uma Luxu Ba Ministra Emilia Nakfila Ba Bainaka VIP”

.

Jornal Independente Tersa-feira, 15 Jullu 2014

Hafoin Prezidente da Republika (PR) Taur Matan Ruak rejeita atu hela iha uma luxu ba Ministra finansas, Emilia Pires agora nakfila ba bainaka VIP nian.

Vise Primeiru Ministru, Fernando La Sama de Araujo haktuir katak, uma ne’ebe mak harii no lokaliza iha Motael ne’e la’os atu husik abandona deit maibe Governu planeia ona atu oferse uma ne’e ba bainaka especial ruma husi rai liur mai Timor-Leste.

“Uma ne’e ba futuru sei uza ba hodi oferse ba bainaka sira husi rai liur atu uza,” hateten La Sama iha Palasiu Governu horsehik. La Sama esklarese katak, uma ne’e sei la oferese ba bainaka husi nasaun Comunidade dos paises da Lingua Portuguesa (CPLP), nia dehan, uma ne’e sei ba bainaka especial seluk ne’ebe hakarak vizita Timor-Leste.

Uma ne’e rasik, antes ne’e atu entrega ba PR Taur Matan Ruak atu hela, maibe, Primeira Dama Izabel Ferreira hateten, depois simu tomada de pose Prezidente Republika deklara lakohi hela iha uma luxu, tanba deside inisiu nia kandidatu an ba Prezidente Republika la’os atu hetan uma luxu, maibe mai atu serve povu.

“Ami ne’e povu kiak no mai para atu servi povu, ami iha fatin para hela, ne’e duni se atu preokupa uma nusa la preokupa ba povu ne’ebe mak presiza uma, la’os ba Prezidente,” dehan Primeira Dama. 

Primeira Dama Izabel Ferreira mos rezeita informasaun ne’ebe dehan membru Governu balun tenta hala’o aprosimasaun ho nia.

.