Semana ne'e, Xanana deklara rezignasaun

.

Jornal Independente - 29 de Jullu de 2014

Díli - Tuir planu Primeiru Ministru Xanana Gusmão sei hato´o nia diskurso deklarasaun polítika rezignasaun iha terseiru Konferénsia Nacional estra-ordinária Partidu Congresso Nacional Reconstrução de Timor-Leste (CNRT).

Plannu deklarasaun politica rezignasaun PM Xanana diáriu ne´easesu iha agenda konferénsia nasionál CNRT nian. Terseiru konferénsia nasionál ne´e sei hala´o iha loron 2 to´o 3 fulan Agostu tinan ida ne´e, iha Sentru Konvensaun Díli (SKD).

Antes ne´e mos Presidente partidu CNRT ne´e deklara ona nia planu rezignasaun husi nia kargu Primeiru Ministru iha fatin publiku Sentru Konvensaun Díli no fatin neébé sagradu tebes iha Parlamentu Nasionál no Palasiu Prezidensiál Nicolau Lobato.

Eis Komandante da Luta ne´e deklara sei hato´o nia rezignasaun hafoin konferênsia Comunidade Países da Língua Portuguesa (CPLP), ne´ebé Timor-Leste sei lidera tinan rua nia laran.

"Hau nia rezignasaun sei fó sai depois cimeira CPLP ne´e remata," dehan Xanana ba jornalistas foin lalais ne´e.

Tuir Xanana katak, rezignasaun ne´e hodi bele fó konfiansa ba jerasaun foun sira hodi bele simu kargu todan ne´e atu bele brani enfrenta resolve probçema nasaun nian.

Desizaun ne´e rasik, Xanana informa ona ba Presidente da República, Taur Matan Ruak, eis PM Mari Alkatiri, eis Presidente Parlamentu Nasionál, Francisco Guterres Lu-Olo, eis Presidente José Ramos Horta no públiku sira.

Públiku Hakarak Remodelasaun, La´os Rezignasaun

Entretantu, desizaun Xanana Gusmão nian ne´e hamosu pró-kontra entre povu Timor-Leste inklui militante partidu CNRT no grupu Independênsia sira konsidera seidauk to´o tempu ba Xanana resigna aan.

Tuir Prezidente Komisaun Independente, Saturnini "Lulik" Ricardo Freitas dehan, intensaun rezignasaun Maun Boot, Kay Rala Xanana Gusmão, husi kargu Primeiru Ministru RDTL la´os solusaun ne´ebé oportuna iha momentu ida ne´ebé Timor Leste hasoru dezafiu boot, iha âmbito nasionál, rejionál no internasonál.

Nia dehan bainhira Xanana resigna aan husi ninia kargu, maka sei mosu implikasaun oi-oin ne´ebé sei revela iha iha área mak hanesan afecta estabilidade governativa no hamosu ámbitu cultura politica "infantilizmu" ne´ebé la sólida tanba implika mudansa iha governasaun, rezignasaun, iha parte ida, sai hanesan mudansa foun iha sociedade Timorense ne´ebé presiza tempu hodi adapta.

Iha parte seluk, segurança nasaun ida ne´e bele prejudika tanba ho auzénsia husi Maun Boot, bele fó oportunidade atu grupu foun mosu hodi kria instabilidade iha nasau ida ne´e.

Alende ne´e, sei afecta konfiansa estrangeira atu investe iha ita nia rain tanba ta´uk no recheio ho segurança, aktu ne´e bele afecta mós ba Planu Estratéjiku de Dezenvolvimentu Nasionál 2012-2030 ne´ebé Maun Boot rasik mak sai autor, manifesta esforsu boot no empeñu hodi desenvolve rai ida ne´e.

Bele mós sei difikulta ba prosesu implementasaun ba Desentralizasaun  Administrativa ne´ebé Maun Boot maka hahú no daudauk ne´e iha hela prosesu nia laran, bele mosu manobra husi nasaun viziñu no nasaun boot sira seluk, hodi kria instabilidade iha rai laran.

Ikus liu, tuir Lulik nia analisa katak, sei hamosu implikasaun iha lideransa nasionál tanba seidauk iha susesór ba liderança nasionál hanesan Maun Boot, ne´ebé forte no influente iha senáriu internasionál hodi defende interesse nasionál hosi estranjeiru.

Bazeia husi realidade ne´ebé mencionada maka ami  hanesan grupu ne´ebé apoia maun boot ba primeiru ministru iha V Governu Konstitusional fó afirmasaun ba ami  nia pozisaun katak rezignasaun "no" remodelasaun "yes"...!!! deklara Lulik liu husu konferênsia de Imprensa ba jornalistas iha Díli, Domingu (28-7).

Tuir nia katak, medida konkreta ne´ebé Maun Boot tenke foti mak di´ak liu tenke halo remodelasaun no re'estruturasaun iha V Governu Konstitusional nia laran, teki realiza urjentemente hodi bele fó resposta ne´ebé sólida, dinámika no assertiva hodi muda situasaun hirak ne´e ne´ebé aposta ba kompozisaun membru Governu nian ne´ebé ho karakter inklusivu no inter-patidariu no mós meritu profisionál.

Entretantu iha parte seluk, portavós Colimau Comando Libertasaun Maubere (COLIMAU 2000), Osório "Leque" mós informa katak, seidauk to´o tempu ba Xanana atu resigna aan husi kargu Primeiru Ministru. Tanba Xanana seidauk realiza nia mehi atu fó moris di´ak ba povu tomak liu husi kampaña politica CNRT husi 2012 to´o 2017.

"Ami considera seidauk to´o tempu ba Maun Boot Xanana atu resigna aan, tanba nia seidauk realiza nia promete iha kampaña," tenik nia.

Tuir nia katak sei mosu problema ruma iha Governu nia laran, di´ak liu Xanana tenke halo de´it remodelasaun ba estrutura Governu sira ne´ebé servisu ladún di´ak hodi troka fali ema seluk.

,