"Opozisaun Husu Konxiensia Xanana Troka Emilia"

.

Jornal Independente - Kinta-Feira, 02 Jullu 2014

Partidu Opozisaun FRETILIN iha Parlamentu Nasional (PN) husu konxiensia Primeiru Ministru Xanana Gusmao atu troka Ministra Finansas, Emilia Pires.

 Ezijensia ne'e, Deputadu FRETILIN sira hato'o bazeia ba sira nia observasaun ba efetividade servisu Ministra Finansas nian duarnte ne'e, la fo oportundiade ba servisu estadu no Povu Timor-Leste no haree liu servisu internasional nian.

"Ita preokupa tebes ho senhora Ministra nian auzensia, tanba ne'e ita atu rona husi se, tanba ne'e Ministra Finansas Emilia Pires nian tenke subtitui fali ema seluk, husu ba superior Governu nian atu troka, se nia iha kompetensia ba servisu seluk reprezenta Timor-Leste entaun ita husu para servisu," dehan deputadu Eladio Faculto, iha meza Plenaria PN, Tersa, horsehik.

Lamentasuan hirak ne'e hato'o, bainhira Ministra Finansas la marka prezensa iha ajenda tersa (01/7) horsheik, ne'e atu esplika sobre prosesu sira ne'ebe mak durante ne'e sai preokupasaun reprezetante povu iha PN. Maibe Sekretaria Estadu asuntu parlamentar (SEAP), Maria Viegas konfirma fali katak, Ministra auzensia ba Australia, tanba ne'e la iha tempu no nia Vise mos sei okupadu hela ho servisu seluk tan ne'e labele partisipa iha PN.

Ho auzensia ne'ebe la klaru halo deputadu sira preokupa no lamenta tebes no servisu Ministra Finansas Emilia Pires nian ne'ebe mak durante ne'e nunka fo atensaun ba servisu internu nasaun no Povu.

Antes ne'e, Komisaun C (trata Finansas Publika) no Komisuan B (Trata seguransa defeza no negosiu Estranjeiru) haruka ona karta ba Ministeriu Finansas no Ministeriu Defeza Seguransa atu marka prezensa iha PN hodi selika sobre lei tributaria, lei impostu no material husi forsa armada nian ne'ebe mak sei importa mai.

"Loloos Ministru Defeza Seguransa tenke atu mai esplika kona ba kestaun balun ne'ebe mak pertinente duni ba nasaun," dehan deputada Isilda ho lamenta. Iha fatin hanesan, Deputadu David Diaz Ximenes dehan, pedidu atu enkontru ho Ministru Defeza no seguransa, Xanana Gusmao no Ministra Financas Emilia atu bele koalia kestaun importante atu bele desidi buat balun ne'ebe mak artikula ona hodi solusionada tiha.

Entertantu, Prezidenti Parlamentu Nasional, Vicente Guterres husu ba SEAP, Maria Viegas atu mantein kontaktu nafatin ho membru sira ne'e, antes feriadu resesu bele marka ba loron 9 no 10 fulan-Jullu tinan 2014.

Vicente dehan, asuntu ne;ebe deputadu sira hato'o importante tebes no husu ba membru Governu sira atu kumpri no respeita. Nune'e mos Sekretariu estadu, Maria Viegas promete sei informa ba Ministru no Ministra relevante atu bele marka ajenda ba data ne'ebe mak PN desidi ona.
,