Movimentu Ilegal Buras iha Batugade

.

Timor Post - 30 de Jullu 2014

Batugade - Masque Polísia Unidade Patrollamentu Fronteira (UPF) monta ona iha postu fronteira iha Batugadem, maibé movimentu ilegál sei buras nafatin.

"Hau nia haree movímentu ilegál iha fronteira Batugade buras iha alfândega no fatin rua hanesan TC8 no TC12 maka buras tebes ho atividade ilegál tama sai," dehan Xefe Suku Batugade João Pereira ba Timor Post iha nia hela fatin, Batugade, Segunda (28/7).

Nia dehan, iha dalan rua ne´ebé maka ema sempre tama sai ilegál ne´ebá. Balu la hatama buat ida, maibé liu ba mai livre. Iha balun hatama sasán hanesan mina no buat seluk tan.

Polísia UPF halo kontrolu maibé kuandu sira hetan kaer, maibé parte ida susar Polísia atu kaer tanba maioria ema nia kór hanesan de´it.

Tuir Xefe Suku ne´e katak durante tama sai ilegál iha fronteira ne´e nia nota katak sásan só ema hatama mina hodi ba halo negósiu, Haree ba movimentu ilegál ba mai buras tebes, nia parte ba halo inkontru ho komunidade hela besik fatin rua ne´e hodi fó hanoin sira atu labele hatudu uluk dalan atu ema movimentu ba mai iha fatin ne´e.

Atu dehan de´it katak dalan ida tama ilegál se bainhira fó livre nia impaktu ba nasaun sempre iha. Agora ó tama ba ne´ebé sosa de´it mina di´ak keta halo sosa tan buat seluk, entaun la di´ak ba nasaun.

Xefe suku ne´e husu atu alfândega no Polísia UPF atu halo kontrolu máximu iha fatin rua ne´e maka buras liu ema tama ilegál.

Tuir xefe suku ne´e nia observasaun, fatin ema tama ilegál iha lubuk ida. Bele liu taxi no mós rai maran, maibé fatin rua hanesan TC8 no TC12 maka movimentu buras liu tanba livre ba ema tama ilegál iha ne´ebá.

João informa, tuir loos polísia tenke halo kontrolu ba ema Timor no ema sira hela iha Atambua ne´ebá katak atu identifika loos ema Atambua maka ne´ebé no ema Timor maka ida ne´e atu nune´e bele hatene atu halo kapturasaun ba ema sira tama ilegál.

"Ha´u atu hatete tan katak ema Atambua-Indonézia ho ema timoroan kuaze kór ida de´it kulit metan hotu, tanba ne´e susar oituan atu identifika. Tanba ne´e parte polísia maka tenke kontrolu maka´as," João hatete.

Antes ne´e, jornalista Timor Post tenta konfirma parte Polísia Fronteira iha postu Tunubibi Maliana, maibé Segundu Komandante la fó komentáriu tanbá tuir irárkia só primeiru komandante maka iha kompeténsia atu koalia. (gus)

.