MOP Sei Sobu Projetu Laiha Kualidade

.

Foto de, PT

Timor Post - 30 Jullu 2014

Díli - Ministru Obras Públik (MOP) Gastão Sousa informa katak, projetu ne'ebé mak ka´er hosi kompañia sira iha Díli laran hanesan baleta ne´e tenke iha kualidade, sela´e governu sei la halo pagamentu no sei sobu.

"Kuandu ADN tun ba halo fiskalizasaun mak laiha kualidade , lalika selu ida, tanba ne´e mak ADN tenke ba fiskaliza projetu hirak ne´e iha kualidade ka laiha kualidade," dehan Gastão Sousa ba Timor Post iha Palasiu do Governu, Tersa (29/7).

Nia dehan, projetu hirak ne´ebé mak la hotu antes CPLP ne´e, agora tenke hahú fila fali no tuir Ministru projetu ne´ebé mak halao iha Díli laran la´os prepara de´it ba CPLP, maibé ba ema Timor-oan rasik Timor-oan sira mak utiliza.

Alende kona-ba prosesu pagamentu nian dehan, governu tenke selu tuir prosedementu ne´ebé iha, maibé projetu hirak ne´e tenke hatudu kualidade, no husu ba kompañia sira tenke hatudu responsabilidade hodi gere projetu hirak ne´e tuir governu nia hakarak.

Nia dehan, oras ne´e projetu kuaze lubuk ida ona mak finalize ona antes preparasaun CPLP, maibé iha balun mós mak to´o oras ne´e  seidauk finalize, no nia dehan governu sei kontinua servisu hamutuk ho ADN para oinsa halo fiskalizasaun ba projetu hirak ne´e hotu li-liu ba sira ne´ebé mak hahú fila fali projetu iha Díli laran.

Parte seluk Presidente Conselhu Nacional Juventude Timor-Leste (CNJTL) Leovigildo Hornai, husu ba governu ho ADN atu toma atensaun projetu iha Díli laran li-liu iha parte Surikmas ba Delta nian la tuir stand ne´ebé iha.

"Tuir hau nia observasaun ba projetu baleta iha Díli laran li-liu parte Surik Mas ba Delta nian ne´e klot los i ita haree hanesan la tuir fali standar, i ne´e governu persiza fó atensaun," nia informa.

Tanba ne´e nia husu ba governu liu hosi ministeriu competente atu foti medida emidiata hodi fo sansan ba kompañia sira ne´ebé mak kaer projetu baleta, no husu governu li-liu Parlamentu Nasional atu fiscaliza no di´ak liu sobu, tanba selae bele hamosu impaktu negative iha loron ikus li-liu impaktu ba comunidade sira. (cos)

.