Kazu Bobby Boye, Tama Ona Iha Tribunal Amerika

.

Jornal Nacional Diário - Wednesday, July 02, 2014

Kazu eis asesor Timor Leste (TL), Bobby Boye ne’ebé na’ok Timor Leste nia osan ho montante US$ 3.5 milaun, oras ne’e dadauk tama ona iha tribunal Amerika nian hodi hala’o investigasaun.

La Sama dehan, maske kazu ne’e tama ona iha tribunal, maibé to’o oras ne’e, tribunal iha Amerika seidauk husu buat ruma mai Timor Leste, li-liu kona-ba testamuña.

“Kazu eis asesor Ministériu Finansa Bobby Boye oras ne’e sira tama ona ba prosesu iha tribunal, hodi hala’o investigasaun iha Amerika ne’ebá, maibé ida ne’e konforme tribunal atu husu,”relata Fernando La Sama de Araújo ba Jornalista sira, Tersa, (01/7) iha nia kna’ar fatin Palácio Governu.

Maibé La Sama hatutan, bainhira tribunal presiza testamuña husi Timor Leste nian atu esklarese buat ruma, maka Timor Leste prontu atu ba.

Bobby Boye ne’e hetan ona kapturasaun husi Federal Bureau of Investigation (FBI) semana kotuk, tanba lori halai osan Timor Leste nian ho montante US$3.5 milaun.

Bobby Boye, servisu sai asesor iha Timor Leste iha tempu governu Aliansa Maioria Parlamentar (AMP) nian.

La Sama esplika, eis konsultor governu nian ne’e sidadaun Amerika ida, ne’ebé hetan kontratu husi governu Timor Leste atu sai konsultor ba governu Timor Leste. Maibé to’o ikus konsultor ne’e halo fali hanesan ne’e ba Timor Leste.

Bobby Boye hahú serbisu iha 2010 iha divizaun fiskál petroleu husi Ministériu Finansas Timor-Leste ne’ebé selu husi Noruega.

Iha tinan 2011, individu ne’e hahú Timor-Leste maka selu. Osan ne’ebé maka nia simu iha tinan ne’ebá ho dolar 2050 (besik euro 1083).

Durante tinan 2012, Opus and Best hetan kontratu husi Timor-Leste ho valór dolar millaun 7,8.

Bobby Boye hetan kaer, iha loron-Kinta, mane ida ne’ebé kondenadu husi Bergen, iha New Jersey, tanba hetan akuzasaun katak, nia halo ona fraude kontra país estranjeiru ida ho valór a’as liu, dolar millaun 3,5 (besik euro millaun 2,5) iha pagamentu ba empresa ne’ebé kaer sekretamente husi ema, Opus and Best.tap 

,