“Kareta BMW 37 To’o Ona TL”

.

Foto de Aikurus Nice

Jornal Independente - Segunda-feira, 14 Jullu 2014

Kareta Luxu BMW hamutuk unidade 37 ne’ebe mak Governu Timor-Leste (TL) sosa hodi fasilita simeira Comunidade Pais Lingua Portugues (CPLP) to’o ona iha Dili.

Kareta hirak ne’e, Governu sosa direita husi fabrika kompania BMW rasik iha Jakarta, Indonesian h0 nia folin total hamutuk millaun $10 dolar Amerika.

Diretor Patrimonia Estadu husi Ministeriu Finansas (MF), Evangelina Guterres la esplika detallu folin kada kareta.

Nia dehan, kareta hirak ne’e atu fasilita Xefe Estadu no Xefe Governu sira bainhira mai partisipa iha simeira CPLP, ne’ebe sei hahu iha loron 17 to’o 23.

“Kareta agora daudaun ne’e to’o ona iha TL, no oras ne’e para hamutuk iha edifisiu foun Ministeriu Finansas Aitarak laran,” Hateten Diretor Evangelina liu husi via telephone horsehik.

Hanesan uma nain ba sieira CPLP ne’e, Primeiru Ministru Xanana Gusmao tenke gasta osan hamutuk milaun $10 hodi sosa kareta BMW atu fasilita ba Xefe Estadu no Xefe Governu sira iha simeira CPPLP.

Entertantu, iha parte seluk, antes ne’e sosiedade sivil no deputadu balun iha PN lakonkorda ho politika Governu Xanana nian atu sosa kareta BMW ne’e tanba konsidera gasta de’it osan povo nian.

Maske nune’e, Governu Timor-Leste liu husi Primeiru Ministru Xanana Gusmao kontinua hasai desizaun hodi gasta osan estadu.

Alende kareta ho marka BMW hamutuk unidades 37 neebe mak sei fasilita Xefe Estadu no Xefe Governu sira bainhira partisipa simeira CPLP ne’e, Governu mos oras ne’e daudaun prepara hela planu seluk atu oferese tan kareta sira seluk ne’ebe antes ne’e iha ona ba tula delegasaun sira.
.