"Horta: Agio, La Sama no Dr. Rui Tama Kategoria Ukun"

.

Jornal Independente - Kinta-Feira, 10 Jullu 2014 

Eis Prezidente Republika, DR. Jose Ramos Horta nu'udar lider antigu ida hahu fihir ona jerasaun foun ne'ebe tama iha kategoria atu ukun. 

Tuir nia haree katak, Heremenegildo Pereira (Agio) atual Ministru prezidente Consellu de Ministru, Fernando La Sama de Araujo atual Vise Primeiru Ministru no eis Ministru Saude Dr. Rui Araujo iha kapasidade no esperensia atu assume kargu Primeiru Ministru bainhira PM Xanana Gusmao rejigna aan. 

Kapasidade individual, Ramos Horta dehan, Ministru Agio iha esperensia internasional no nasional maka'as. "Nia (Agio) manan esperensia boot ne'e, inklui mos nia hanesan elementu ida CNRT que hau haree uniku que it abele hatete kapasidade politiku ne'e maka'as los," hateten Horta ba INDEPENDENTE iha Farol, horsehik. 

Horta afirma, aleinde Ministru Agio ne'ebe mak tuir nia haree iha kapasidade atu lidera nasaun ne'e, Horta mos tau nia konfiansa maka'as ba iha Dr. Rui Maria de Araujo no Vise Primeiru Ministru, Fernando La Sama de Araujo, tanba sira ne'e rasik iha esperensia maka'as kona ba ukun. Tanba ne'e, Ramos Horta kontinua dezafia nafatin jerasaun foun sira atu labele tauk kaer ukun bainhira Primeiru Ministru Xanana Gusmao rejigna aan, tanba TL oras ne'e iha lideransa barak mak iha esperensia no ema ne'ebe diak. 

Xanana Gusmao rasik sei hamrik iha jerasaun foun sira nia kotuk atu fo apoiu, tanba ida ne'e mak xanana nia planu ba jerasaun foun sira. Iha fulan Dezembru liu ba bainhira hau mai vizita TL, hau hasoru malu ho maun Xanana, Dr. Mari Alkatiri, Dr. Lu-Olo ami koalia kona ba ideiassira ne'ebe iha relasaun ho maun Xanana nia rejignasaun, ami haree atu oinsa ami jerasaun 1975 ne'ebe funda nasaun ida ne'e ho ami nia sakrifisiu kosar been no raan oinsa mak atu entrega ba jerasaun foun, maibe laos entrega arbiru deit, tenki hamrik hamutuk enkuantu ami nia saude sei diak," dehan Horta. 

Horta esklarese liu tan katak, planu rejignasaun husi PM Xanana rasik iha ona, no iha ona jerasaun foun sira ne'ebe iha kapasidade no esperensia masimu atu lidera nasuan ne'e ba futuru ho diak liu tan. Maibe, tuir Horta katak, atu entrega poder ba jerasaun foun sira, primeiru tenki respeita nafatin demokrasia. 

 "Portantu ita labele halo eleisaun depois soe tiha partidu ne'ebe mak manan eleisaun, tanba ne'e mudansa ruma mak mai tenke tuir nafatin rejultadu eleisaun iha 2012, katak CNRT kontinua maioria, segundu partidu kontinua FRETILIN no PD, atu alterasaun ka jerasaun foun ka remodelasaun tenke tuir nafatin ekilibru ida ne'e iha Parlamentu nia laran, i se maun Xanana sai, maun xanana ho elementu Partidu CNRT sei haree se mak kualidade liu para kaer Xanana nia fatin, i se husi FRETILIN, FRETILIN tenki halo desizaun se hakarak tama ka lae, ba iha Governu foun ida, hanesan koligasuan ka inkluzaun, mas importante mak lideransa partidu sira ne'e mak tenke koalia ba malu, maun Xanana tenke dada hotu para koalia," tenik Horta. 

Maibe Horta haktuir, kona ba planu Primeiru Ministru xanana nia atu rejigna an ka halo remodelasaun ne'e demokrasia no kompetensia xefe Governu nian. 

Tamba iha mundu hotu-hotu iha demokrasia , remodelasuan ne'e normalmente kuandu to'o ona tinan ida liu tiha, PM halo dadauk ona remodelasaun bazeia ba rejultadu avaliasaun servisu membru Governu. 

Horta dehan, nia mos rona ofisialmente ona kona ba planu Primeiru Ministru Xanana Gusmao atu rejigna aan husi nia kargu. 

Antes ne'e, eis Primeiru Minsitru Mari Alkatiri mos deklara katak, PM xanana Gusmao konfesa ona ba nia, loos duni atu rejigna aan, maibe molok atu rejigna aan sei halo retiru ho nia membru governu sira, tuir planu, PM Xanana sei halo remodelasaun ba estrutura Governu. 

Maibe, tuir Vise Primeiru Ministru La sama de Araujo dehan, planu atu halo remodelasaun ne'e boatu deit, tanba tuir nia katak, laiha ema ida hatene kona ba planu Xanana atu halo retiru molok atu rejigna aan. 

.