"Hili Fo'er Hale'u Dili, Moras Antigu PM Xanana Mosu Hikas"

.

Jornal Independente -Tersa-Feira, 01 Julu 2014 

Primeiru Ministru (PM) Kay Rala Xanana Gusmao hahu ulun fatuk moras fila fali ona (moras antigu), hafoin hili fo'er haleu Dili laran iha loron sabadu to'o Domingu kalan boot. 

Xanana nia moras antigu ulun moras ne'e, akontese derepenti de'it bainhira hamutuk ho Sekretariu Estadu Politika Formasaun Profesional Empregu (SEPFOPE), Ilidio da Costa Ximenes ho nia staff sira hala'o limpeza jeral hamoos rai hahu husi Ponte Komoro too Palasiu Prezidneti Ai-tarak laran, Dili. 

Tuir observasaun diariu ne'e, durante hahu limpeza husi Ponte Komoro PM Xanana seidauk senti ninian ulun moras, maibe hafoin limpeza lao ain hodi hili foer iha dalan la'o to'o iha area Fatuihada Tower nian oin, foin sente ulun fatuk moras maka'as. 

Husi ulun moras hataka ne'e, nia tenke deskansa iha minutu balun iha salaun Tower nia laran hodi hemu tiha kafe foin PM Xanana senti diak. Maske senti moras, nia obriga nafatin hili foer iha kalan boot, iha tuku 1 oras Timor-Leste hahu husi fatuhada ba to'o Palasiu Prezidenti Ai Tarak laran Dili. Iha segunda (30/6) horsehik PM xanana labele tama servisu, tanba tuir informasaun ninia ulun sei moras no presiza deskansa oituan. 

Antes ne'e, iha loron Sabadu, PM Xanana Gusmao akompania husi membru Governu sira hanesan, Ministru pedro Lay, Ministru Kalbuady Lay, MOP Gastau Sousa,Vise Ministru Abel Ximenes, Sekretariu Estadu Ricardo Nehu, Sekretariu Estadu Ilidio Ximenes no membru Governu balun tan hamutuk ho emprezariu sira ba fiskaliza merkadu taibesi Dili hodi prepara muda negosiante sira husi Merkadu hali laran ba taibesi. 

Hafoin ida ne'e, PM Xanana ho Ministru kalbuady Lay kontinua observa diretamente ba haree projeitu Ministru Turizmu nian hodi hadia jardin sira iha Dili laran hahu husi jardin palasiu Governu, Kolmera, jardin 5 de maiu, Jardin Motael, Jardim Farol no hare problema tasi ho laloran maka'as sae ba komunidade iha Tasi Tolu. 

,