Fulan Agostu CNRT deside Xanana Rejigna

.

Timor Post – 26 de Jullu 2014

Díli-Partido Congresso Nasiónal Da Reconstrução de Timor (CNRT) sei hala'o konferensia extraordinária iha inisiu fulan Agostu hodi deside sobre rejignasaun Kay Rala Xanana Gusmão hosi Primeiru Ministru (PM) ba V Governu Konstitusional.

"CNRT sei hala'o konferensia extraordinária atu iha partidu laran bele deside hamutuk nia rejigna-an ka la rejigna-an," vise prezidenti bancada CNRT, deputada Domingas Alves " Bilou Mali" hatete ba Timor Post (25-7) iha PN.

Maski antes ne'e iha loron 5 fulan Janeiru iha inkontru partidu CNRT nian, eis comandante FALINTIL ne'e deklara ona ba estrutura partidu nian katak atu rejigna no hanesan mos deklarasaun ne'ebé mak halo husi Primeiru Ministru rasik atu rejigna iha fulan Setembru 2014, hafoin realiza cimeira CPLP.

Tanba ne'e estrutura Conselhu Politica Nacional prepara tiha inkontru dala rua hodi deside data sorumutu iha loron 2 to'o 3 fulan Agosto.

"Kona ba fatin atu hala'o Konferensia Nacional extraoridin]arria ami seidauk decide, maibe data fiksu Hatete tiha ona ne'e, " deputada Bilou dehan.

"Kuandu maun bo'ot rejigna-an duni, iha ema seluk para bele kaer fila kargu hanesan primeiru ministru, tanba hau koalia tuir tempu funu.

"AMI iha frente armada que maun bot sira oituan deit, balun inimigu kaprura, balun oho, to'o maun bo'ot rasik ema kaer ba kastigu iha Cipinang Indonezia. Depois ema seluk bele lidera nafatin to'o hetan ukun-an. Tanba ne'e hau fiar iha ema seluk bele kaer kargu primeiru ministru lori prosesu tomak ba ohin," deputada Bilou Mali dehan.

Deputada rasik seidauk hatene ba pessoal ida ne'ebé mak bele troca karismatiku ne'ebé mak ho nia kapasidade tomak hodi deside halo orientasaun ba prosesu dezenvolvimentu ne'ebé mak ema hotu senti, maski balun sai preokupasaun ba publiku.

"Hau hanoin prosesu lao normal, tanba nia idade, husi tempu funu nia sakrifika nia-an to'o tinan 12 kaer prosesu dezenvolvimentu, tanba ne'e nia presija mos descansa," Bilou Mali Hatete.

Nu'udar veterana iha tempu luta libertasaun Timor Leste akompanha prosesu dezenvolve iha Timor Leste iha vantajen barak no desvantajen durante tinan 12.

"Iha prosesu dezenvolvementu buat balun lao diak ona no fo vantajen ba nasaun no povu, maibéiha buat balun seidauk lao diak tanba ne'e ita preocupa," nia dehan.
.

Antes ne'e iha plenária Parlamentu Nacional deklara husi deputadu opozisaun sira husu ba Primeiru Ministru atu labele "lambe" fali kaben ne'ebé mak tafui ona.

Ha'u husu ba maun bo'ot atu labele lambe fali kaben ne'ebé mak tafui ona (deklarasaun rejignasaun husi kargu Primeiru Ministru -red), tanba ida ne'e ema hotu hein karik akontese duni ka lae," deputadu Antonino Bianco hatete.(uly)

.