"Calisto Deklara Liberdade Ba Autor Trafiku Droga Orden Komandu"

.

Jornal Independente -Kinta-Feira, 02 Jullu 2014 

Arguidu Calisto Gonzaga deklara katak, nia parte tenke fo livre ba ema estranjeiru nain lima (5) ne'ebe hala'o trafiku droga, tanba hetan orientasaun husi Komandante Jeral Polisia Nasional Timor-Leste (PNTL). 

Eis Komadante Servisu investigasaun Kriminal Nasional (SIKN) ne'ebe nia deklarasaun iha prosesu julgamentu, iha Tribunal Distrital Dili (TDD), tersa, horshik. Parte investigasaun halo kapturasaun ba autor trafiku droga nain lima, ne'ebe mai husi Singapura liu husi Aeroportu Internasional Nicolau Lobato, Dili, iha loron 20 fulan-Outubru tinan 2013. 

 Aleinde halo kapturasaun, prend emos droga 6,5 kilograma, osan, telefone no material sira seluk, maibe liu tiha loron rua, iha loron 23 fulan-Outubru arguidu husik tiha drogadu sira ne'e fila ba Indoneszia. 

"Liberdade ba autor trafiku droga sira) konsidera legal tanba orientasaun husi komandu PNTL hodi lorin nain 5 ba Indonezia, tanba iha asina MoU entre Komandu PNTL ho parte Indonezia nian," hateten Calisto ba Tribunal. 

Iha prosesu julgamentu, arguidu Calistro kontinua rejeita akuzasaun Ministeriu Publiku, tanba nia konsidera an la halo krime. Tanba nia parte la halo detensaun ba suspeitu nain lima, nain haat (4) husi Indonezia no nain ida (1) husi Afrika do Sul, nia dehan, Polisia halo deit vezilansia ba drogadu sira ne'e. 

Arguidu konfesa katak, suspeitu sira la ba prosesu iha Ministeriu Publiku (MP), tanba tuir nia, kazu ida ne'e uniku iha relasaun internasional. Entertantu, testamunha Faustino Maia de carvalho hateten ba Tribunal katak, sira nia parte la halo detensaun maibe, halo vezilansia de'it ba autor trafiku droga sira. 

Maibe, nia parte la hatene kona ba prosesu husik suspeitu nain lima ba Indonezia Jakarta tanba tuir nia rona bazeia ba orden husi Komandu Polisia Nasional Timor-Leste (PNTL). 

 Kona ba hasai fotografia, osan no seluk tan nia parte mos lahatene, tanba momentu ne'eba ema barak liu. Momentu sira kaer suspeitu ne'e, nia (Faustino) husu ba nia xefe seksaun Almerio katak, prosesu ne'e ohin halo nusa, maibe nia dehan hein deit prosesu husi komandu. 

"Almero dehan ami hein deit orden, depois hau rona fali, dehan orden husi komandu atu husik ema sira ne'e ba Indonezia," hateten testamunha ne'e ba Tribunal. Nia dehan, bainhira sira kaptura, lori kedas suspeitu nain lima (5) mai iha Kuartel Jeral PNTL, hodi hasoru malu ho Komandante Jeral PNTL Longuinhos Monteiro no Primeiru Ministru Xanana Gusmao. 

Hafoin ida ne'e, sira kontinua lori kedas ba Palasiu Prezidente Nicolau Lobato hodi hasoru malu ho Prezidente da Republika Taur Matan ruak. Depois remata ida ne'e kontinua lori fali suspeitu nain lima ne'e ba iha Hotel central durante loron lima nia laran, sira hetan orden husi komandu katak, lori suspeitu ne'e ba Indonezia. 

"Hau, Calisto no Almerio mak akompania (suspeitu sira) to'o Jakarta, maibe durante ami ba iha ne'eba sira la koalia buat ida, ne'ebe hau la hatene," dehan nia. 

Ho deklarasaun testamunha no Arguido Calisto nian, Ministeriu Publiku akuza Arguidu Calisto komete krime Sekuestru (Penculikan) no partisipasaun ekonomiku, regula ho artigu 160 alinea 2 no 283 kodigu penal Timor-Leste. 

Hafoin rona deklarasaun hudi testamunha, Tribunal Distrital Dili adia julgamentu ne'e ba loron 23 fulan-Jullu tuku 14:00 oras Timor-Leste. Audensia julgamentu ne'e prezide husi Juiz koletivu Julio Gantes, Jose Maria de Araujo ho Zumiati Maria, Ministeriu Publiku (MP) reprezenta husi Prokuradoria Angelinha Saldanha ho Gloria Alves no Arguidu hetan asistensia legal husi defensor Publiku Sergio Quintas ho Marcal Mascarenhas. 

Antes ne'e mos testamunha Miguel Pedro nuudar membru investigasaun hateten, iha loron 19 no 20 fulan-Outubru tinan 2013 momentu ne'e nia hela iha rairobo, meudia fila mai Dili. Iha kalan simu telefone husi komandu seksaun Almerio hodi halo vezilansia ba ema nain lima iha Hotel Central ne'ebe lori droga mai Timor-Leste. 

Kona-ba hasai fotografia, osan no seluk tan nia parte la hatene, tanba momentu neeba nia so halo deit vezilansia no akompania suspeitu nain lima too iha Aeroportu hodi fila ba Indonezia. 

.