"Armazen La Sufisiente, SAMES 'Habai' Ai-moruk Iha Li'ur"

.

Jornal Independente - Kinta-Feira, 03 Jullu 2014

Membru Komisaun F (trata asuntu saude no edukasuan) iha Parlamentu Nasional (PN), kuarta horsehik halo inspensaun urjente ba servisu autonomu Medikamentu Ekipamentu saude (SAMES), iha Kampu Alor, Dili.

Rezultadu husi inspensaun ne'e, membru PN identifika mal-jestaun balun, SAMES Soe lekar (habai) ai-moruk iha loron manas (iha liur), tanba armazen la sufisiente.

Prezidenti Komisaun F, Virgilio Hornai hatete, inspensaun urjente ne'e hala'o atu hatene direta jestaun Ministeriu Saude nian ba distribuisaun medikamentu nian.

"Bai-bain husu komisaun F nian kuandu tuun ba iha Distritu ermera, Oekuse ai-moruk iha stok mamuk, depois iha informasaun ikus dehan ai-moruk tama barak maibe fatin atu rai ai-moruk laiha, ne'e signifika katak, MS laiha inkapasidade atu jere," Prezidenti Virgilio lamenta hodi hato'o ba jornalista sira, iha armazen SAMES horsehik.

Nia dehan, ai-moruk hirak ne'ebe lekar iha liur ne'e orsamentu tinan 2013, maibe ai-moruk foin tama iha tinan ida ne'e (2014).

"Hau hanoin orsamentu ba 2014 nian ba kompras medikamentu mos iha nafatin, problema distribuisuan ai-moruk loloos tama iha tinan 2013 maibe tama fali iha 2014, ne'e kria ai-moruk liu prazu entaun ita estraga gasta deit osan estadu," Virgilio lamenta.

Tan ne'e, nia parte ezije ba Ministeriu saude atu hadia jestaun distribuisaun ai-moruk atu nune'e ai-moruk labele liu prazu. Tuir nia katak, Ai-moruk labele rai kleur iha kontainer, tanba ai-moruk hirak nee nia tipu la hanesna, nia dehan, ai-moruk balun bele augenta rai manas no balun labele augenta.

"Hau orsida tenta telefone kedas Diretor ADN para atu hare situasuan ne'e ho emerjensia, situasuan emerjensia ne'ebe mak agora akontese duni hanesna ne'e ita la espera katak bainhira udan boot ruma, aimoruk hirak ne'e bele estragus," dehan nia.

Hataan ba preokupasaun hiran ne'e, Diretor SAMES, domingos Afonso hateten, armazen ne'e nia funsaun simu ai-moruk depois rai no halo distribuisaun. Nia dehan, atu halo distribuisaun ba ospital Distritu bazeia ba pedidu ne'ebe haruka husi ospital mai.

,