“Aman Obriga Oan Halo Relasaun Seksual Tama Prizaun Tinan 18”

.

Jornal Independente Kinta-feira, 17 Jullu 2014

Arguidu ho naran inisial JJC hetan pena prizaun tinan 18, tanba obriga no ameasa nia oan feto rasik ho naran inisial MPC halo relasaun seksual too isin rua.

Tribunal Distrital Dili (TTD) hamonu sentesa prizaun ba arguido ne’e, iha loron Kuarta, horsehik. Arguidu ho idade kuaze tinan 60 halo relasaun sexual beibein ho nia oan feto hanesan lezada ho minoria idade tinan 14.

“Akontesementu ne’e iha Aileu, bainhira arguidu ho lezada iha toos laran, udan boot, kalohan taka rai, arguidu JJC hemu tua lanu hodi obriga nia oan rasik halo relasaun sexual,”esplika ofisial Justisa ida ba Jornalista sira iha Tribunal Distrital Dili (TDD), horsehik.

Tan ne’e, Tribunal aplika penan tinan 18 prizaun ba arguidu ne’e tamba provadu halo komete krime violensia seksual ba lezada ho inisial MPC.

Liu husi leitura akordaun, Tribunal aplika pena prizaun tinan 18 ba arguidu JJC ho krime rua mak hanesan violensia seksual ba idade kiik no obriga relasaun seksual entre aman ho oan.

Oras ne’e lezada nia paradeiru iha uma mahon, no arguidu horseik tama kedas ba prizaun Becora. Audensia julgamentu ne’e, prezidi husi juis Koletivu, Duarte Tilman, Julio Gantes, Jose Maria de Araujo, Ministeriu Publiku (MP) reprezenta husi Prokuradora Gloria Alves no arguidu hetan asistensia legal husi defensor Publiku Marcal Mascarinhas.

.