"Alkatiri Hakbesik Aan Ba Bankada FRETILIN Ba Asuntu Eleisaun Komisariu KAK"

.

Jornal Independente -Tersa-Feira, 01 Julu 2014

Sekretariu Jeral Partidu FRETILIN Mari Alkatiri sei hakbesik aan ba bankada FRETILIN iha Parlamentu Nasional ba asuntu prosesu eleisaun Komisariu Komisaun Anti Korupsaun foun.

Alkatiri halo aprosimasaun nu'udar deputadu hodi koalia ho nia kolega deputadu sira kona ba oinsa atu hili komisariu Komisaun Anti Korrupsaun ne'ebe to'o agora seidauk iha desizaun.

"Ohin hau sei koalia ho Bankada, hau mos deputadu, para atu deskute buat ida ne'e," dehan eis Primeiru Ministru ne'e ba Jornalista sira, iha uma fukun Parlamentu nasional, segunda horsehik.

Tuir Alkatiri katak, prosesu hili Komisariu KAK mak kleur sei bele fo impaktu ba iha servisu KAK ninian, tanba, dehan nia bainhira Komisariu KAK tanba se lae mak sei iha de'it dalan rua katak, la presiza ona KAK entaun dissolve tiha.

Tuir nia dehan, kuandu dissolve tiha KAK, entaun reforsa de'it Ministeriu Publiku. Tanba to'o agora daudaun kandidatu rua ne'e seidauk hetan maioria iha Parlmaentu nasional. Kona ba kritika Primeiru Ministru Kay Rala Xanana Gusmao hasoru KAK, Alkatiri haktuir katak, ne'e ida-idak nia kostura.

Maibe nia rasik nunka halo buat ida ne'e tanba tuir nia hanoin husik justisa lao tuir nia dalan. Maski nune'e, tuir lider opozisaun ne'e katak, Primeiru Ministru halo nia reasaun hanesan ne'e la signifika katak KAK, Ministeriu Publiku no Tribunal sira ne'e la servisu ona. Nia fiar katak, instituisaun tolu ne'e sei nafatin iha idnependensia Justisa.

.