"Sosa Kareta BMW, PM Xanana sei "Nonok"

.

Jornal Independente - Tersa-Feira, 24 Junu 2014

Ministeriu Negosiu Estranjeiru no Kooperasaun (MNEK) seidauk hetan desizaun klaru husi Primeiru Ministru (PM) Xanana Gusmao kona ba planu atu sosa karreta hodi fasilita Xefe Estadu sira iha Simeira Comunidade dos Paises da Lingua Portuguesa (CPLP).

Sekretariu Ezekutivu Komisaun Organizadora ba Simeira CPLP, Antonio Cepeda dehan, to'o ohin loron PM Xanana seidauk hato'o informasaun ruma ba sira kona ba atu sosa kareta. "Ami seidauk rona saida mak PM xanana hato'o mai ami, mas ami haree husi Jornal de'it, mash au haree hanesan bele mos atu sosa duni kareta, tanba it abele halo buat hotu diak no enkuantu transporte la diak ne'e mos bele prejudika ita nia imajen nuudar uma nain ba simeira CPLP," deklara Antonio iha edifisiu MNEK, Pantai Kelapa, horsehik.

Nia dehan, tuir proposta ne'ebe mak iha, governu sei sosa kareta ho modelu BMW husi nasaun vizinu Indonesia.

"Ikus liu ami propoin tan atu sosa kareta Luxu, mas ne'e depende ba desizaun PM Xanana Gusmao, tanba to'o oras ne'e ami seidauk rona rasik husi PM xanana nia ibun kona ba planu sira ne'e," dehan nia.

Nia hatutan, total orsamentu ne'ebe Governu prepara atu sosa kareta hodi fasilita Xefe Estadu sira iha simeira CPLP ne'e hamutuk millaun $1 resin.

Maske seidauk iha desizaun husi PM Xanana, maibe tuir Antonio, iha tempu besik nia laran planu sira ne'e sira realiza duni.

Iha parte seluk, PM Xanana Gusmao husu ba Ministru Negosiu estranjeiru no Kooperasaun (MNEK) Jose Luis Guterres atu iha tempu besik nia laran tenke hadia lalais ona sasan sira ne'ebe aat iha MNEK, atu nune'e bainhira simeira CPLP lao tenki ho diak.

Tuir observasaun PM xanana nian iha edifisiu MNEK, sasan sira ne'ebe mak konsidera aat no presiza troka mak hanesan lampu (eletrisidade nian), hariis fatin, bee-moos no seluk tan.

,