PM Xanana : “PN Laiha Faktus Akuza Ha’u Intervein Justisa”

,

Jornal Nacional Diário - Tuesday, June 2, 2014

Primeiru Ministru (PM) Kay Rala Xanana Gusmão afirma katak, nia halo intervensaun ba kazu Ajensia Dezenvolvimentu Nasional (ADN), tanba tuir nia hatene, durante ne’e ADN halo buat hotu atu salva orsamentu Estadu, la’os atu naok osan Estadu.

Xanana hatutan, Parlamentu Nasional koalia sala, tanba intervensaun Primeiru Ministru nian ba Kazu Ajensia Dezenvolvimentu Nasional (ADN), los, la’os atu interven ba justisa.

“Parlamentu Nasional koalia sala, tanba sé ha’u husu ba Jornalita sira dehan, tenki iha responsavel iha faktus, entaun Parlamentu Nasionál laiha faktus atu akuza ha’u dehan ha’u interven justisa,”afirma PM Xanana ba Jornalista sira iha Ministériu Negósiu Estranjeiru, hafoin asiste asaun solene tomada de pose ba Diretur Jerál no Nasional MNEK nian hamutuk na’in 20, Segunda (23/6).

Xanana dehan, nia interven iha ADN, tanba intituisaun refere tutela ba Gabinete Primeiru Ministru nia okos. Entaun servisu saida mak durante ne’e ADN halo, Xanana mós hatene.

Antes ne’e PM Xanana hirus tebes, tanba Tribunal fó Termu Identidade Rezidensia (TIR) ba Diretur Jeral ADN Samuel Marçal tanba deskonfia komete Korupsaun Koluzaun no Nepotismu (KKN), ba projetu fíziku sira ne’ebé namkari iha Timor laran tomak.

“Ami poupa US$140 milloens ba fali Estadu, dehan fali ADN na’ok Estadu, hodi sira halo tiha TIR ba Samuel Marçal. Ne’ebé ha’u haree ba ema sira dehan katak, ema sira ne’e atu kaer ami hotu, maibé ha’u dehan ona, ha’u preparadu atu ba iha tribunál, ha’u hakerek ona karta rua ka tolu ba KAK katak, ha’u preparadu atu ba tribunál, maibé sira dehan, ha’u atu ba hatán iha ne’ebá tanba segredu justisa. Maibé segredu justisa ne’e kuandu dehan ha’u naok osan ne’e maka dehan katak segredu justisa, maibé ba husu fali ha’u dehan katak, ponte Comoro ne’e halo ho osan iha ne’ebé, planu iha ka la’e, ida ne’e Parlamentu halo saida, Tribunál de Kontas halo saida,”afirma PM Xanana.

Agora dadauk ne’e, Samuel Marçal labele kontrola projetu sira ne’ebé la’o, no labele halo viajen ba rai liur, tanba hetan ona TIR husi tribunál.

Xanana esplika, problema ida kona-ba bee ida iha Iliomar, bolu kuaze finansa tomak atu ba iha Baucau, tanba KAK dehan ADN na’ok ona osan husi projetu bee ne’e, hodi KAK ba rejista kazu ne’e iha Ministériu Públiku (MP) atu bele ADN.

Xanana dehan, kanalizasaun bee ba Iliomar, tanba buat ne’e la’o ho PDD sira ne’e hotu, populasaun sira na’ok tiha kanu sira ne’e, entaun buat ne’e demora liu, Xanana haruka ADN ba haree.

ADN ba to’o tiha ne’ebá, ADN tenki muda tiha kanalizasaun bee ne’e nia dezeñu, tanba buat ne’e besik hela, maibé sira halo kanalizasaun bee ne’e kurva ba mai, entaun ADN muda tiha dezeñu ne’e ba kanalizasaun bee ne’e tun los deit, hodi poupa osan Estadu nian.

Relasiona ho ida ne’e, Parlamentu Nasionál kestiona maka’as konaba intervensaun PM Xanana nian ba kazu ADN Samuel Marçal.

Parlamentu mós dehan, ikus-ikus ne’e, Prokuradoria Jerál da Repúblika (PJR) foin book-an Primeiru Ministru (PM) Kay Rala Xanana Gusmao interven kedas hodi lori la’o Diretor Ajensia Dezenvolvimentu Nasional (ADN) Samuel Marçal ba hasoru kedas PJR José Ximenes.

“Ha’u husu deit ba Primeiru Ministru labele interven iha kazu sira ne’ebé mak konaba justisa nian tamba iha semana kotuk ami rona ona Prokuradoria Jeral da Repúblika fó sai ona membru Governu balun ne’ebé mak involve diretamente iha projetu sira ne’e no halo abuzu de poder”, hateten deputadu Manuel Castro husi bankada FRETILIN.

Deputadu husi bankada FRETILIN ne’e dehan, PJR keta halo problema ho director Ajensia Dezenvolvimentu Nasional (ADN) Samuel Marçal karik, tamba ne’e Primeiru Ministru Kay Rala Xanana Gusmão salva nia ne’e hanesan Anju da Guarda ida ne’ebé iha hela Primeiru Ministru nia sorin maibé keta halo ba Anjo da Guarda lori nia ba tama fali iha infernu.

“Ne’e la’os ami mesak kestiona maibé Prezidenti Repúblika sosiedade mós kestiona maibé la ho ema seluk maibé la ba ho ema seluk maibé ba fali ho ADN ida ne’e mak ami preokupa oituan lolos ne’e labele husik iha ne’eba la’o justisa mak tetu los dehan los, kuandu sala dehan sala”, deputadu opozisaun ne’e husu PM labele interven.tap/alm/mj1

,