Mari Alkatiri: Viajen Barak Ba Estranjeiru, Rezultadu La Iha

.

Jornal Nacional Diário - Monday, June 09, 2014

Eis Primeiru Ministru (PM) Primeiru governu konstitusionál no aktual Sekretáriu Jerál Partidu istóriku FRETILIN, Mari Bim Amude Alkatiri kontinua krítika governu ida ne’e, relasiona ho ezekusaun orsamentu primeiru trimestre governu ne’e nian, ne’ebé hatudu katak, orsamentu ba viajen nian pursentu bo’ot liu.

Tuir Alkatiri katak, membru governu sira hala’o viajen bar-barak ba rai estranjeiru, maibé laiha rezultadu husi membru governu sira nia vizita ba rai liur ne’e mai hodi implementa iha sira nia rai rasik.

Alkatiri dehan, orsamentu tinan ida ne’e ba ezekusaun primeiru trimestre ne’e vizita estranjeiru mak barak liu. Tanba ne’e Alkatiri dehan, nia sei kontinua krítika ida ne’e, tanba kuandu membru governu sira halo viajen bar-barak ba estranjeiru maibé nia rezultadu laiha, signifika katak iha buat ruma sala iha ne’ebá.

“Ha’u krítika buat ne’e dala hira ona, maibé sira tama husi ne’e, sai husi ne’e. Ha’u krítika dala hira ona katak, viajen internasionál bar-barak laiha rezultadu gasta osan deit, ida ne’e ha’u sei krítika nafatin. Membru governu sira koñese liu mundu internasionál duke sira nia rai rasik,”relata Alkatiri ba Jornalista sira foin lalais ne’e iha Aeroportu Internasional Prezidenti Nicolau Lobato, Comoro, Dili.

Nia informa katak, uluk kuandu Ministru ida atu sai, nia parte husu uluk proposta husi ministru ne’ebé mak hakarak atu sai ba rai liur.

“Ha’u dehan o halo o nia proposta ida mai, o sai ba o gasta osan hira, o atu lori osan fila hira. Tanba uluk ne’e osan laiha be ita mós haknauk iha ne’e, haknauk iha ne’ebá para buka osan. Maibé agora ne’e la’e, sira nia proposta ne’e dehan deit, presiza osan hira ba sira atu lori ba para sira gasta, hanesan perdiam, no buat sira ne’e hotu, ida ne’e sala ona. Kuandu haree ba ezekusaun primeiru semetre ne’e la to’o 30%, maibé barak liu mak ba fali viajen internasionál, ida ne’e buat ruma sala ona,”afirma Alkatiri.tap

,