"Komisaun E PN Konsidera Governu "Trai" Planu OJE"

.

Jornal Independente - Tersa-Feira, 10 Junu 2014 

Fiskalizasaun membru Parlamentu Nasional (PN) Komisaun E halo identifika katak, governu halo 'traisaun' ba Planu Orsamentu Jeral Estadu (OJE) 2014 nian, tanba implementasaun projeitu infraestrutura la tuir planu ne'ebe Governu aprezenta iha diskusaun OJE 2014. 

Prezidenti Komisaun E Parlamentu Nasional (PN) Pedro Martires da Costa hateten, fiskalizasaun no monitorizasaun ba ezekusaun orsamentu Governu nian fo perioridade liu ba projeitu emerjensia, maibe laiha implementasaun ba projeitu ne'ebe planeadu husi orsamentu Jeral Estadu 2014 nian. 

"Ami haree ejekusaun OJE 2014 iha fulan lima Governu la implementa projeitu ne'ebe ita aprova no fo perioridade liu husi planu orsamentu, maibe governu implementa fali prjeitu emerjensia ne'ebe la mai iha planu orsamentu nian," dehan nia iha uma fukun PN horsehik. 

Nia hatutan, projeitu emerjensia hirak ne'e fo impaktu ba PN liuliu Komisaun E atu halo fiskalizasaun no monitorizasaun, tanba la tuir planu orsamentu Jeral estadu nian. 

Governu implementa projeitu emerjensia barak iha Dili laran hanesan estrada, drenajen no jardin, inklui iha Distritu balun ne'eba la mai husi planu orsamentu jeral estadu nian. 

Ne'e duni, deputadu Pedro husi bancada CNRT ne'e husu ba Governu hodi hadia frakeiza no hapara implementasaun porjeitu emerjensia ne'ebe laiha kategoria emerjensia, atu nune'e, bele dudu dezenvolvimentu liu husi Orsamentu Jeral estadu (OJE).

.