Eis Asesor Ministeriu Finansas Halakon Osan Millaun 3.5 - FRETILIN Ejije Ministra Finansas Responsabliza

.

Lian Parlamentar Fretilin - 25 de junho de 2014

Bankada FRETILIN Ejije Ministra Finansas Responsabliza

Eis Asesor Ministeriu Finansas ho naran Boby Ajiboye ne’ebe servisu ba governu Aliansa Maioria Parlametar (AMP) iha tinan 2010 -2012 , hetan kaer husi Federal Bureu of Investigation (FBI) Estadus Unidus America tanba hetan prova hodi halakon estadu Timor Leste nia osan hamutuk millaun 3.5 dollar Americano.

Iha semana kotuk FBI Kaer eis Asesor Ministeriu Finansas ne’e iha Aeroportu New Jersey tanba komprova katak nia halo frauda komspirasaun hodi tranfere osan millaun tolu ho balun ba konta bankaria ida naran Opus & Best iha Estadus Unidus America , no ikus mai osan sira ne’e nia uja hodi sosa kareta luxu mode;u bentley ne'ebe folin hamutuk 172,000, Range Rover ho folin 100,983 no rolls Royce ho folin 215,000 no arloji designer ho folin besik 20,000 dollar Americano,no uma luxu ida ho folin millaun 1.5.

Relasiona kazu ne’e, Bankada FRETILIN iha Parlamentu Nasional ejije atu Ministra Finansas tenki responsabliza tanba Ministra Finansas mak legaliza hodi asesor ne’ebe servisu iha Ministeriu Finansas iha tinan 2010 no 2012.

Vice Prezidenti Bankada FRETILIN Camarada Deputadu Fransisco Branco hatete, iha tenpu ne’eba Bankada FRETILIN kestiona atu Opus & Best ne'ebe governu simu hodi tranfere osan ba, maibe Ministra Finansas Emilia Pires iha tenpu ne'ebe defende makas katak Opus & best ne'e iha esperensia no integridade tanba hari kleur ona.

Maibe realidade Opus & Best ne'e hari iha tinan 2012 tanba ne'e Bankada FRETILIN Ejije Ministra Finansas Emilia Pires tenki responsabliza ba osan millaun 3.5 nudar ema ne'ebe lidera Ministeriu Finansas hodi aseita no fo kontratu ba Eis Asesor Boby Ajiboye ho nia Opus & best.

.