"Diretor ADN Hetan TIR, PM Xanana preokupa"

.

Jornal Independente -Sesta-Feira, 20 Junu 2014 

Primeiru Ministru (PM), Xanana Gusmao sente ladun kontente ho desizaun Tribunal Distritu dili (TDD) hodi fo termu identidade Rezidensia ba Diretor Ajensia Dezenvolvimentu Nasional (ADN) Samuel Marcal tanba razaun fo TIR ne'e halo konfuzaun. Xefe Governu dehan, nia respeita desizaun tribunal hodi fo TIR, maibe nia la konkorda kuandu sobu projetu sira mos hetan konsiderasaun nu'udar aktu korupsaun. 

"Hau apresia sira nia esfosu, hau hakru'uk.... Rei sira nia ain hotu dala ida de'it, mais ita kuandu laiha metodolojia ida atu hanoin ba saida mak ita halo ne'e mak susar tebetebes," hateten PM Xanana iha palasiu Prezidensia Republika, Ai-Tarak laran, Kuarta (18/6). 

"Agora ami sobu projeitu sira ne'ebe aat no laiha kualidade ne'e dehan fali ami naok osan estadu, ami muda BOQ (Bill of Quantity) hodi poupa osan estadu nian dehan fali ami naok osan estadu nian, ida ne'e mak halo hau haree katak ita nia matenek sira, balun kala (hasai kursu) PhD (S3) hotu, Hasai PhD iha ne'ebe hau la hatene..... kompriende oituan saida mak KAK, saida mak korupsaun." 

"Ne'ebe dala ruma ita atu kaer malu ne'e, hau atu husu dehan katak imi iha injineiru ka, imi iha arkitetu ka, diskute BoQ ho hau, dekute ho hau la'os dehan katak ami muda iha ne'e la diak, ami poupa milaun U$140 ona ba estadu, dehan fami ami naok osan estadu nian, dehan fali ami naok osan estadu nian, halo tiha TIR ba Saumel Marcal," dehan PN Xanana. 

Nia dehan, husi projeitu hamutuk 800 iha tinan 2009, so projeitu 30 husi total projeitu 800 ne'e mak la'o la diak, so projeitu to'o 40-45 mak lao diak natoon no restu lao diak hotu. Xanana mos lamenta tebes ho hahalok husi kompania balun ne'ebe mak kuandu hetan ona projetu ruma gosta atu halo fali sub-kontratu. 

Husi sub-kontratu ne'e mak dala barak hamosu projeitu laiha kualdiade, dehan nia. Ho ida ne'e mak, iha tinan 2009, PM Xanana halo reforma boot ida dehan nao, loke dadaun ona emprezariu lokal iha Distritu no Sub-Distritu mos.

 Xanana husu ba KAK no Ministeriu Publiku atu bainhira iha evidensia forte kona-ba akuzasaun sira hasoru ADN, Xanana Prontu atu ba hata'an iha Tribunal. 

"Labele tauk atu bolu hau, hau pronto atu ba hataan, labele tauk tanba dehan hau Primeiru Ministru, ne'e sa KAK ida ne'e mak tauk fali hau Primeiru Ministru ne'e, tau took ba iha Tribunal mak hau ba hataan, atu haree took imi nia perguntas saida, pergunta beik teen ninian, se karik dehan hau naok osan hau ba hataan, sim mas atu ba husu fali problema sira ne'ebe parlamentu mak tenke husu bah au, ne'e hau la ba hataan," dehan nia. 

Kona-ba nia prezensa iha edifisiu MP iha segunda (16/6), PM Xanana dehan nia hasoru malu ho Prokurador Jeral daa Republika (PJR) Jose Ximenes, atu fo hatene ba PJR atu halao viazen ba Singapura. 

Maibe Xefe estadu la esplika klaru kona-ba konteudu husi vizita ba Singapura ne'e. Entertantu, deputadu Manuel Castro husu ba Primeiru Ministru Xanana atu labele intervein demais servisu justisa nian tanba se lae justisa sei la lao diak iha nasaun ida ne'e. 

"Hau husu ba Primeiru Ministru atu labele intervein iha kazu sira kona ba justisa nian," dehan Manuel, iha uma fukun PN kuarta (18/6). 

Nia dehan, ema ne'ebe mak preokupa kona ba partisipasaun Primeiru Ministru ho ADN iha prokurador jeral laos Parlamentu Nasional deit maibe inklui mos prezidenti Republika no sosieade sivil sira. 

"Ne'e laos ami deit mak kestiaona, Prezidente Republika mos kestiaona, sosieade sivil mos kestiaona maibe la ba ho ema seluk ba fali ho ADN, ne'e mak hanesan ami preokupa oituan," dehan Manuel. 

.