"Boye Hetan Ameasa Tama Prizaun Tinan 20, PN Husu MF Esplika Ba Povu"

.

Jornal Independente - Kinta-Feira, 26 Junu 2014 

Eis-Asesor Governu Timor-Leste ne'ebe hetan kaer husi Estadus Unidus Amerika nia 'federal Bureau of Investigation' (FBI) iha semana kotuk, iha ameasa tama prizaun tinan 20 ka multa dala rua husi osan ne'ebe nia hetan, edifisiu Ministeriu Publiku EUA nian hatete. 

 Entertantu, Parlamentu nasional iha Dili horsehik husu ba Governu, liu-liu Ministra Finansas (MF) Emilia Pires atu fo esklaresementu klean ba povu hodi hatene kazu ne'e, tanba hahalok Boye ne'e halakon ona osan povu nian ne'ebe ke boot tebetebes. 

Iha semana kotuk, FBI kaer sidadaun Amerika ida ho naran Bobby Aji-Boye iha aeroportu New Jersry tanba deskonfia envovle iha frauda konspirasaun hodi halakon osan nasaun estranjeiru ida ho montante millaun $3.5. 

Tuir keixa katak, osan ne'e Boye hatama ba konta bankaria firma opus & Best ne'ebe nia rasik mak kontrola. Boye servisu ba Ministeriu Finansas Timor-Leste iha 2010-2012 nu'udar asesor ida. Iha inisiu servisu, Governu Noruega mak selu, maibe iha dalan klaran Governu Timor-Leste mak selu nia salariu. Bainhira nu'udar asesor, Boye rekomenda Ministeriu Finansas atu halo kontratu serbisu ho firma Opus & Best iha EUA ne'ebe dehan hamriik ona dezde 1985, tuir faktu katak firma ne'e foin hamrik iha 2012. 

Keixa hateten katak, Governu Timor-Leste la hatene katak Opus & Best ne'e nuudar firma falsu ida. Boye uza osan ne'e hodi sosa propriedade iha New Jersey kuaze liu millaun $1.5, karreta Luxu tolu ho modelu Bentley ne'ebe nia folin hamutuk $172,000, Range Rover ho folin $100,983, no Rolls Royce ho folin $215,000, no arlozi designer ho folin besik $20.000, alegasaun husi Ministeriu Publiku EUA hateten. 

Relasiona ho kazu ne'e, Ministeriu Publiku EUA dehan Boye iha ameasa hetan kastigu tama prizaun tinan 20 ka selu multa dala rua husi osan ne'ebe nia hetan husi nasaun vitima. 

Tuir alegasaun katak, Boye nuudar membru Opus & Best no membru ida ba komite ne'ebe mak revee konkursu. Entertantu, Vice Prezidenti Parlamentu Nasional, Aderito Hugo husu ba Governu, liu-liu Ministeriu Finansas atu esplika klean kona-ba prezensa Boye iha TL nuudar asesor iha tempu pasadu. 

"Ita hein katak, ita nia governu no orgaun estadu nian sira seluk ne'ebe mak durante ne'e envolve iha prosesu rekrutamentu ba eis asesor ne'e, atu bele hato'o informasaun detallu ba povu Timor-Leste sobre fallansu ida ne'e, fallansu ida ke halo ita monu ba tentativu ema legal ida ou advisor ida ne'ebe mak afinal to'o ikus ita hatene ema ne'e laiha kompetensia," hateten Aderito Hugo iha PN horsehik. 

Ho akontesementu kapturasaun husi FBI hasoru eis asesor ne'e, Aderito husu ba Mimistra Emilia Pires atu fo resposta klaramente ba publiku tamba povu iha direitu atu hatene saida mak akontese. 

Nune'e, Vise Prezidenti Bancada FRETILIN, Deputadu Francisco Miranda Branco dehan, Ministra Emilia tenke responsabliza fraude ne'e tanba nia mak uluk defende loos Boye bainhira sei sai asesor hela. 

"Hau hanoin ho aktu ida fraude kontra estadu TL ne'e ita presiza kestiaona Ministra Finansas tanba nia mak legaliza fraude ida ne'e, horiuluk kedas Parlamentu nasional Kestiaona kontratu ida ne'e maibe, Ministra Finansas iha uma fukun defende katak ema ne'e iha kredibilidade, seriu no esperensia iha kestaun fiskal nian," dehan Branco. 

 "Ida ne'e tanba deit, MF nia konfiansa fo kontratu ba ema ne'ebe mak la loos to'o polisia federal kaer katak, nia halo fraude ba estadu ita nian," deputadu Branco dehan. 

Deputadu ne'e lamenta tamba konfiansa MF ba sidadaun rai liur to'o ikus hetan ona rejultadu ne'ebe mak la diak ba estadu Timor-Leste, tanba ne'e deputadu Bancada opozisaun ne'e husu Ministra Finansas nia esplikasaun klaru sobre aktu ne'e. 

Iha publikasaun INDEPENDENTE, hrsehik, Ministru Negosiu Estranjeiru no Kooperasaun (MNEK), Jose Luis Guterres hateten katak, Governu Timor-Leste konfirmadu ona ho informasuan kona ba kapturasaun ba Aji-Boye. 

"Ema ne'e uluk servisu duni iha MF nuudar asesor, no ita simu ona informasaun, no ida ne'e loos duni, konfirmadu tanba ne'e relatoriu FBI nian," hateten Ministru Jose Luis, iha Palasiu Governu foin daudauk ne'e.

.