PR Taur : Nicolau Lobato Hanorin Ita Latauk Infrenta Dezafius

.

Jornal Nacional Diário - Monday, May 19, 2014

“Dezafius sei barak, difikuldades sei bo’ot, Nicolau hanorin ita latauk infrenta dezafius no brani lao ba oin hodi manan dezafius sira ne’e, Nicolau mehi e ita fila nia mehi ba realidade, faktu ida ne’e komprova deit saida maka ema matenek sira hateten, laiha buat ida iha mundo que posivel se karik ita hotu hakarak atu to’o iha ne’ebe deit. Ita nia badinas, ita nia determinasaun maka lori ita atu manan dezafius sira ne’e,”Prezidenti da Republika (PR), Taur Matan Ruak hato’o iha ninia diskursu ba serimonia inaugurasaun estatuta presidente Nicolau dos Reis Lobato,Domingo (18/5) horseik iha Rotunda Comoro, Dili.

Xefe Estado, Taur Matan Ruak afirma, Nicolau Lobato laos deit partensi ba pasado, maibe partensi ba futuru e Nicolau Lobato nia naran no nia mehi sei la lakon iha povu Timor Leste ninia fuan, tanba Nicolau Lobato prezenti no partensi.

“Ohin iha fatin ida ne’e Sr. Reogeiro Lobato, Sr. Mari hateten, Nicolau Lobato laos pertensia deit pasado, Nicolau asim de todo pertensi ba prezenti no pertensi ba futuru. E nia naran ho nia mehi sei la lakon tanba ita moris, e ita determinado loos atu lao ba oin hodi manan tan dala ida,”haktuir PR Taur.

Husi inaugurasaun Estatua Nicolau Lobato ne’e hodi presta homenajen ba heroi Nicolau Lobato no heroi sira seluk ne’ebe fo a’an ba mate ikus mai Timor Leste atinji objektivu hodi hetan ninia Independensia sai Nasaun ne’ebe maka livre.

“Tinan 30, 1975 Unilateral, tinan 36 liu bainhira Nicolau Lobato mate, tinan 15 liu bainhira ita organiza referendum no vota ba Ukun A’an. No tinan 12 liu depois de ita restaura ita nia independensia ohin iha 18 de Maiu 2014 iha fatin ida ne’e ita presta homenajen ba ita ita nia heroi nasional ida “Nicolau Lobato, prezidenti da Republika no komandante em xefe das Forsas Armadas” Nicolau Lobato hateten ho konviksaun tomak e Hau aseita ita nia vitoria kestaun defende. E tempu fo razaun ba nia bom Timor Leste sai Nasaun ida livre no Independenti. Maibe sofrementu barak, sakrifisiu barak maka ita fo hodi hetan duni ita nia Independensia, ema hira maka la mate, hira maka la liman tohar no ain tohar, maluk hira maka la husik hela iha ita nia rain, oan kiak hira maka kontinua padese ho terus iha ita nia rain. Ita fo hondra memoria ba ita nia herois sira nian maka ita hametin liu tan, haburas liu tan ita nia unidade no Independensia ita Nasaun nian,”hateten PR Taur.

“Iha estatua ida ne’e ita sei haree Nicolau Lobato aman Nasionalismu Timor nian. bandeira iha nia liman iha Rotunda Comoro ne’ebe uluk Bazartete nian mos ita sira ne’ebe maka moris hakilar tebes Timor Ukun Rasik A’an dunik ona. Tanba ne’e ohin ita fo homenajen ba sira hotu ne’ebe kontinua servisu makas, para que ita nia rain aban bainrua bele kumpri mehi ne’ebe Nicolau Lobato husik hela mai ita hotu fila ita nia Nasaun, sai Nasaun ne’ebe diak liu tan, ne’ebe prosprio, ne’ebe forte, ne’ebe seguru no ne’ebe Timor oan sira hetok servisu hamutuk liu tan atu dezenvolve Nasaun ida ne’e,”

“…statu Nicolau Lobato nian ne’ebe orsida loke ita hotu-hotu ne’ebe iha ne’e no sira ne’ebe laiha iha ne’e hotu-hotu husu to’ok ba ita nia a’an saida maka ita halo ona para que kontribui ba moris diak ita nia familia nian no moris diak ita nia Nasaun nian,”dehan Taur.

Iha inagurasaun estatua Nicolau Lobato ne’e Primeiro Ministro (PM), Kay Rala Xanana Gusmão mak loke Bandeira ne’ebe falun metin estatua heroi bo’ot Nasaun Republika Demokratika Timor Leste (RDTL), eis prezidenti RDTL, eis Komandante em Xefe das FALINTIL no eis Prezidenti RDTL, Nicolau dos Reis Lobato. Hafoin ne’e e kontinua ho tiru paison hodi hafutar estatua heroi aswain nasaun RDTL nebe iha nia liman los kaer bandeira RDTL no liman karuk hit hela kilat G3 ida. alf

.