Osan Barak Gasta Ba Eventu Maibe Povu Kiak Ba Bebeik

.

Foto de, Aikurus Nice

Suara Timor Lorosae - 5 de Maio de 2014

DILI—Politika nain sira Politik agora dadauk gasta osan barak ba halo serimonia kona ba eventu oin-oin, maibe nia rezultadu la benefisia povu no povu  sei kiak ba bebeik.

Tuir Deputadu Bankada FRETILIN, Francisco Branco hatete katak, agora dadauk orientasaun politika nain sira ba iha dezemvolvimentu nasional ho nia prova, laos orientadu atu hamenus kiak, maibe responde deit ba eventu loron bo’ot deit.

“Se ita nia politika dezemvolvimentu nasional maka atu responde eventu loron bo’ot deit, dia nasional deit entaun ita nunka bele rejolve problema kiak iha Timor ida nee, nusa presiza halo projeitu emergensia prepara eventu ida nee, eventu ida ne’eba nee lalos ona tuir lapresiza especial atensaun ba eventu sira nee, eventu sira nee ita selebra duni, ita komemora duni, tamba ida nee mak ita nia istoria, maibe lapresiza ita gasta osan barak, gasta osan barak tuir mehi sira ne’ebe mate ba rai ida nee hakarak hare sira nia maluk ne’ebe moris ohin loron, moris aban bainrua sira nia vida bele nakfila diak liu, kiak bele menus iha rai ida nee, laos festa oi oin ne’ebe ita halo ne’ebe gasta osan barak maibe nia rejultadu laiha,” dehan Deputadu Francisco ba STL, iha PN, Dili, Sesta (2/5/2014). 

Nia haktuir tan kata, ema sira ne’ebe fo isin ba mate nee atu hare moris ne’ebe uluk sira moris laiha fasilidade Infra Estrutura, Edukasaun kualidade ladiak, servisu saude laiha kualidade nunee sira defende fosira nia isin no ran ba rai ida hodi hakarak ohin loron no aban bainrua jerasaun sira ne’ebe mai bele moris nakfila ba diak, moris ne’ebe iha edukasaun ne’ebe diak, moris iha Infraestrutura ne’ebe diak no moris iha servisu saude ne’ebe diak.

Iha fatin hanesan Vise Presidente Parlamentu Nasional, Aderito Hugo hatete katak agora dadauk hanesan pais Estadu Unidas Amerika mos halo buat barak ba nia povu maibe sei iha mos povu balun kiak, iha estadu balu  provinsia balu kiik kestaun uma, kestaun estalasaun bee nee mos problema hanesan Timor nasaun ida foun ukun a’an  tina 12.

Nia hatete, kestaun kapasidade rekursu umanus nee mak lori ema kolia konaba kapasidade ba kontruksaun infraestrutura baziku ninia.

“Ita tenki halo imprestimu atraves imprestimu para ema liu husi  Internasional ne’ebe iha kredibel ona bele halao kontruksaun ba ita nia infraestrutura, nee imprestimu nee laos deit impresta osan, maibe impresta mos sira nia kapasidade tamba ita nia kapasidade rai laran atu bele konstruksaun ba infraestrutura ne’ebe ho teknoligia foun, halo Estrada, halo ponte, halo portu Aria Portu sira nee, tamba ita nia kualidade kapasidade rai laran ninian, entaun ita ba iha imprestimu, ita mos agora atu tama ba parseria publika privada nee tamba saida, konsiderasaun ba ita ninia kapasidade rekursu umanus rai laran presiza tempu,atu to ba nivel ida katak ita to ona lapresiza ona ema liur ita rasik,” nia hatete.

Deputadu Adriano Joao husi Bankada PD hatete katak ema hotu rekoinese dehan kiak iha rai laran sei barak, maibee nee lasignifika ba ema atu labele bokan hodi hadia sira nia moris, tamba oras nee hare investor barak mak mai halo investimentu iha rai laran hodi aluga komunidade sira nia rai ho uma nee konserteza komunidade sira bele hetan osan ba moris loron-loron nian. Carme Ximenes/ Mj7

.