Militantes Fretilin Sai Vítima Operasaun Konjunta

.

TEMPO SEMANAL - Sexta, 30 Maiu 2014 

  

Dili, TEMPO SEMANÁL – Militantes partidu Fretilin iha suku Uaimori-Tula distritu Vikeke, sai vítima ba operasaun konjunta Falintil-FDTL no PNTL tanba deskomfia hetan torturasaun husi polisia estasaun Vikeke. 

Vitima ne’ebé kompostu husi ema nain 10 ne’e sente trauma ho agresaun fíziku ne’e i lori kazu ne’e ba aprezenta iha Parlamentu Nasionál ne’ebé simu direita husi deputadu husi bankada Fretilin Manuel Gaspar. Tanba ne’e ba journalista sira Gaspas haklaken katak, aktu ne’ebé polisia distritu Vikeke halo ba populasaun iha Uaimori-Tula viola rezolusaun ne’ebé estadu fó sai.

“Ha’u nudar reprezentante povu iha uma fukun parlamentu, ha’u hakarak hateten katak senhor komandante ne’e la fó opurtunidade ba povu atu ko’alia. Tuir loloos polisia tenke hala’o ninia knar tuir lei no ordem hodi hakbesik-an ba povu atu povu bele iha komfiansa ba sira. Maibé ho hahalok polisia nian ne’e hatudu momoos katak halo para hakarak hadok povu husi PNTL”, dehan deputadu Gaspar ho lian makaas hodi kurizi profesionalizmu polisia nian iha prosesu atuasaun. 

Entertantu hasaran liafuan hirak ne’ebé vítima sira relata katak, polisia dehan “Uatulari mós ami sei sobu satan hanesan Uaimori-Tula”, deputadu Gaspar responde ho triste katak, “Ha’u ema Uatulari oan, ha’u triste tebes rona liafuan hanesan ne’e. Tanba  senhor komandante ne’e hanoin katak iha Timór ne’e makaas mak Uatulari no fatin hotu-hotu ne’e fraku liu-liu Uamori-Tula. 

Povu tomak hatene katak Uaimori ne’e fatin ba sentru revolusaun nasionál iha tempu okupasaun i foin dadaun koandu funu ne’e atu remata, Uaimori-Tula sai fatin akantonamentu Falintil. Tanba ne’e, atetude ne’ebé polisia halo iha Uaimori-Tula konsidera hanesan krimi hasoru povu. Se krimi hasoru povu maka tenke submete ba investigasaun”, Gaspar haklaken.  

Liutan nia informa katak, hahalok polisia nian ne’e hafoer instituisaun PNTL nia naran iha nivel nasionál, tanba deskomfia membru sira uza fali ba interese privadu. Tuir loloos, polisia tenke husu ba populasaun dokumentus komprovativus hanesan kartaun eleitoral, atu nune’e polisia bele fortifika populasaun hirak ne’e legal ka ilegal. Maibé komunidade hatudu hotu kartaun eleitoral ate kartaun militantes partidu nian, polisia sei kontinua halo agresaun fíziku.

 Tanba ne’e wainhira responde perguntas konaba bandeira hirak ne’ebé militantes partidu Fretilin hasa’e iha sede, tantu bandeira nasionál ka bandeira partidu nian mak halo polisia deskomfia membrus CPD no KRM, ho lian makaas deputadu akresenta katak, se tanba deskomfia de’it mak polisia halo atuasaun hanesan ne’e, entaun membrus polisia ne’e la profesional. “Se o dekomfia o tenke ba investiga para bele hetan razaun fundamentais, ou serake polisia hetan fatin henesan ne’e bele sai evidensia katak ne’e fatin KRM nian, ne’e hatudu katak polisia inkapasidade”, tenik Gaspar.

Tempu hanesan, reprezentante vítima Filomeno Rangel informa konaba kronolojia akontesementu ne’e katak, iha 1 Maiu 2014 polisia bolu sira ba iha sede suku Uimori-Tula no husu ba sira atu labele koalia. “Ami hato’o ba polisia  ami-nia kartaun eleitoral ho kartaun militante maibé sira dehan falsu i polisia mós bandu ami labele halo keixa tanba se keixa maka sira sei foti desizaun. Idepois polisia haruka ami ba ami-nia sede provijoriu iha kamarada Januario nia uma, maibé sai husi sede suku polisia komesa baku ona kamarada Juliao Soares. No bainhira to’o ona iha sede provijoriu polisia baku tan Cansio da Costa hafoin baku tan Adriano tanba atu ba soe be entaun polisia dehan fali se atu soe bee boot ka kiik iha de’it bandeira hun”, haktuir Soares.    

Tanba sente la sala, entaun reprezentante vítima ne’e deklara katak sira sei kontinua dada bandeira iha Uaimori hodi bolu atensaun polisia nian atu ba husu deskulpa ba povu Uaimori liu-liu vítima hirak ne’ebé hetan agresaun fíziku, dehan Rangel. (ts) 

.