"Membru BOP Baku Komunidade Inosente"

.

Jornal Independente - Kinta-Feira, 08 Maiu 2014 

Membru Polisia Nasional Timor-Leste (PNTL) husi Batailaun Ordem Publiku (BOP) baku komunidade ida inosenti Bosco Lobato (52) to'o nia parte oin inus rahun. 

Vitima hala'o ona tratamentu intensivu iha sala urjensia Hospital Nasional Guido valadares (HNGV). Sasin Luis Gonzaga hateten, problema rai iha area Tasitolu ne'e entre nai nain ho ema ne'ebe mak okupa rai. 

Sasin ne'e konta tuir katak, kazu hadau malu rai ne'e hatama ona ba Ministeriu Publiku (MP), maibe (horsehik) dader tuku 10:30 membru BOP ajente Jorge Lopez (Jos Audian) ho Polisia profoos ida derepenti mosu la apar ho problema baku kedas rai nain. Iha akontesementu baku ne'e, Polisia Jo stun husi kareta tebe uluk rai nain, depois mak vitima Bosco hase nia dehan, maun labele baku husu uluk lai mak baku, hafoin ida ne'e, Jos tuir fali ba vitima nia uma hodi baku vitima to'o nia oin rahun no inus rahun. 

"Ami servisu hela iha Mira Mar Blok ami rona mak ami halai ba, Jos ba baku Bosco iha los ami nia oin no hakilar dehan, imi keta bok an hakmatek," hateten sasin ne'e ba jornalista, iha kuartel Jeral PNTL Kaikoli, Horsehik. 

Tan ne'e, Vitima nia maun Rui Ximenes husu ba komandu PNTL atu prosesa lalais kazu ne'ebe mak involve membru BOP ne'e, tanba hahalok baku komunidade arbiru ne'e krime. 

Nia dehan, tasck force sira mos halo hela atendementu iha problema hadau malu rai ne'e no laiha problema ida, maibe derepenti ajente BOP Jos ba halo intervein la liu husi Orden ruma, nia ba ho nia interese rasik. 

"Ita hanesan sidadaun Timoroan tenki eziji PNTL ne'e servisu ho professional foti medidas ruma tuir regras iha orden husi komandu mak sira ba la'os ba arbiru de'it baku ema to'o ran hanesan ne'e hotu sira husik hela no ba ona, ita lakohi hahalok ida ne'e eziste iha ita nia rai timor," dehan vitima ne'e nia maun. 

Nia dehan, ajente polisia ne'e mosu derepenti deit ba iha ne'eba nia la apar ho problema ne'ebe mak mosu antes ne'e, maibe ba baku kedas ema inus hotu to'o rahun. 

Entertantu, Komandante Operasaional Nasional Superitendente Xefe Armando Monteiro hateten, nia simu ona keisa maibe sira sei konsentra ba asistensia tratamentu ba vitima depois mak loke prosesu ba ajensia Jos. 

"Ita sei konsentra ba tratamentu saude vitima nian lai depois mak ita halo prosesu investigasaun tuir kauza husi akontesementu ne'e saida depois mak ami intrega ba departementu justisa mak prosesa kazu ne'e," dehan Armando. 

Iha fatin seluk, Xefe Banku Urjensia HNGV Cosme Saldanha hateten, vitima ne'e hala'o hela tratamentu intensivu iha sala emerjensia nian. "Ita hala'o observasaun ba vitima no hetan katak vitima ne'e nia inus mak deskonfia rahun tanba hetan baku makas," dehan nia. 

Akontesementu ne'e akontese iha area iha tasi tolu maizumenus tuku 10:30, Kuarta horsehik, Membru BOP ne'e ba ho kareta Prado ho Numero matrikula COP A 106. Jornalista diario ne'e hala'o kedas konfirmasaun ba komandante Unidade Espesial Polisia (UEP) Superitendenti Xefe Afonso dos santos maibe nia la fo komentariu tanba iha hela inkontru ho Vise Primeiru Ministru La Sama.

.