"Joven Ida Hetan Oho Iha Fatuhada"

.

Jornal Independente - Segunda-Feira, 05 Maiu 2014 

Joven ida ho idade 25, iha Domingu (4/5), madrugada hetan oho husi ema deskonesidu iha area Fatuhada-Dili. Maski nune'e, to'o agora motivu husi akontesementu ne'e seidauk klaru, tanba Polisia Nasional Timor-Leste (PNTL), Servisu Investigasaun Kriminal sei halo hela prosesu investigasaun. 

"Hau seidauk simu relatoriu kompletu husi hau nia membru forensic sira, tanba akontesementu ne'e iha loron domingu no aban (segunda) mak bele fo sai kumpletu," dehan komandante Servisu Investigasaun Kriminal Nasional (SIKN), Inspetor Xefe Manuel Alves, via telefone horsehik. 

Nia dehan, mate isin PNTL lori ona ba Ospital Nasional Guido valadares (ONGV) hodi halo prosesu autopsia. 

Husi akontesementu ne'e, PNTL mos kaptura ona ema nain rua ne'ebe deskonfia envolve iha kazu ne'e, maibe komandante SIKN rasik seidauk hatene klaru kona ba identidade ema nain rua ne'e. 

"Hau seidauk hatene ema nain rua ne'e nia naran no mos vitima ne'e nian, tanba hau mos sei iha hela terenu," hateten manuel. 

Nia dehan, tuir planu mate isin ne'e sei hala'o prosesu autopsia iha segunda (5/5) depois mak entrega ba familia matebian hodi halao serimonia funeral. 

.