Governu-Igreja Prepara Simu Papa Francisco "Lori Urna Don Martinho Mai TL"

.

Jornal Independente - Sesta-Feira, 09 Maiu 2014 

Estadu Timor-Leste (TL) Hahu diskute ona preparsaun hodi bele simu vizita Amu Papa Francisco mai TL iha tinan oin, inklui lori fila Urna Don Martinho Lopes mai TL. 

Prezidente Republika, Taur Matan Ruak, halo ona enkontru ho Bispo Dioseze Dili, Baucau no Maliana, inklui ho Primeiru Ministru hodi koalia kona ba preparasaun Estadu nian atu simu vizita Amu Papa Francisco. Primeiru Ministru, Xanana Gusmao hafoin reuniaun ho Prezidente Republika hateten, Governu sei koordena diak ho Igreija Dioseze tolu para halo preparasaun diak liu hodi simu vizita amu papa mai rai doben TL bele lao susesu. 

"Sei nomeia lalais pontu Vokal koopera ho dioseze tolu, antes governu Nomeia Embaixador foun ba vatikanu troka Embaixador Ovidio ne'ebe mate ona," dehan nia, iha Palasiu prezidensial, Dili, horsehik. 

PM Xanana hatutan, Governu ho Igreija mos deskute ona, oinsa mak atu haree ema foun ida hodi troka matebian embaixador Ovidio iha vatikanu-Roma, atu bele koopera servisu ho vatikanu ba preparasaun, ante Amu Papa Vizita mai TL. 

Nia hatutan, enkontru Konsellu Ministru foin lalais ne'e, aprova mos lei ida hodi entrega rai mamuk iha Igreija Motael nia sorin hodi entrega ba vatikanu atu loke nunsiatura reprezentasaun iha TL. 

Nune'e, Xefe Governu xanana dehan, enkontru ne'e, Bispu nain tolu, propoin mos ba estadu TL atu kria kondisaun oinsa lori fila fali Urna Bispu Don Martinho Lopes no padre nain tolu ne'ebe mate no hakoi iha Portugal mai TL iha tinan oin, tanba governu sei tau osamentu ba asuntu ne'e. Don Martinho nuudar primeiru Timoroan ne'ebe sai Bispu iha Timor-Leste. 

Nia moris iha Timor-Leste iha 1918 no mate iha Portugal 1991. Mgr Martinho iha tinan barak nudar padre no sai membru Asembleia Nasional iha Lisboa molok nia sai Bispo iha 1977 iha ninia idade 58. 

Nia retira husi nia pozisaun no ba hela iha Portugal iha 1983 hafoin Vatikano hakarak nia sai husi nia rai tanba nia kontra maka'as hahalok militar Indonesia ba Timoroan sira.

.