"TDB Hasai Mandadu Kapturasaun Ba Lider Grupu Ilegal"

.

Notisia Husi TVTL - Tersa-Kalan, 29 Abril 2014 

Tribunal Distrital Baucau (TDB) hasai ona mandadu de kapturasaun ba lider CPD-RDTL no CRN ne'ebe kontinua subar an. Responsavel masimu nain 10 resin mak naran tama iha lista Tribunal nian hodi entrega ona ba komandu operasuan konjunta atu kaptura hodi tuir prosesu justisa. 

Nune'e, segundu komandante tatiku operasaun konjunta FALINTIL-Forca Defeza Timor-Leste no Polisia Nasional Timor-Leste (PNTL) Superitendenti Polisia Agustinho Gomes ba jornalista RTTL Tersa-feira ne'e hateten, mandatu kapturasaun ne'e ba ema nain 12 ne'ebe konsidera hanesan responsavel masimu ba grupu CPD-RDTL no CRM. Tuir segundu komandante katak, orden operasaun hatu'un ona ba komandante kompania iha area Distritu Laga, Quilekai no sub Distritu Bahagia atu ejekuta. Mandatu kapturasaun ne'e ba ema nain 12 mak hanesan, Koboy ho nia kolega sira seluk. 

"Ida ne'e mak klaru ona, identifika ema nain 12 inklui Koboy no Lemorai iha laran, sira nain 12 ne'e hetan tiha ona mandadu detensaun ou Tribunal," dehan Agustinho. Agustinho Gomes afirma tan katak, operasaun konjunta F-FDTL ho PNTL sei kontinua la'o, maske iha lansamentu operasaun ne'ebe hahu iha inisiu fulan Abril tinan 2014 reintegra ona membru CPD-RDTL no CRM nain 156. 

Ema hirak ne'e, balun kaptura iha operasaun, balun fali entrega an ho volontariumente ba komandu operasuan konjunta. Entre nain 156 ne'e nain 34 envolve direta iha asaun kontra polisia iha lalulai iha loron 10 fulan Marsu ne'ebe rejulta membru Polisia ida hetan kanek. 

Enkuantu ema nain 15 mak komandu operasaun konjunta aprejenta ona ba Ministeriu Publiku atu kontinua prosesu ba Tribunal. 

Entertantu, koamndu operasaun konjunta mos sei kontinua halo oprosimasaun ba membru grupu CPD-RDTL no CRM ne'ebe oras ne'e dadauk kontinua subar an atu entrega an ba komandu operasaun konjunta, tamba komandu operasaun konjunta trata sira ho dignu. 

.