PNTL no FDTL insulta dignidade umana iha Komandante Daitula nia moris fatin

.

Forum Estudante Maubere - 22 de Abril de 2014

PNTL no FDTL komete atentadu kontra estadu direitu demokrátiku no insultu hasoru diginidade umana iha Komandante David Alex “Daitula” nia rai moris fatin.

Operasaun konjunta husi PNTL no FDTL persege dala ida tan povu iha Bualale, Laisorulai no Lelalai Kelikai. Operasaun ne’e sobu forsadamente uma hat iha Bualale, iha Laisorulai lai sobu uma ida.

Aleinde sobu uma povu nia (Sede organizasaun) kaer no baku mós ema barak too kondisaun fíziku grave tebes tanba baku ho kilat no tuku tebe. Kaer membru CPD no povu sivíl seluk hamutuk ema na’in 12.

Entre sira João Morais, Justino da Costa no mestre Adelino (husi Lelalai) mak kondisaun grave tebes no Sr. Justino da Costa too agora sei iha ospitál Kelikai tanba laiha ambulánsia hodi transporta ba Baucau hodi hetan asisténsia médiku.

Ema sira ne’ebé Polísia kaptura no tortura ne’e nudár autór prinsipál sira ba funu hasoru okupasaun ilegál Indonézia nia durante tinan 24.

Sira sadere an ba konviksaun Polítika ida hodi firme buka dalan di’ak ba Timor-Leste nia futuru at sai nasaun ne’ebé ho justisa sosiál no justisa ekonómiku.

Entre sira ne’ebé simu intimidasaun ne’e mak sai responsavel ba kaixa sentrál Wasege nia iha Kelikai durante tempu okupasaun Indonézia nia.

Aktu ke’e hatudu insultu kontra funu na’in sira ne’ebé ladevia lori asaun kruél ne’e hodi selu ba sira nia kole no terus. Bainhira kaer ema na’in 12 ne’e tau hamutuk de’it iha posku operasaun konjunta no eskuadra Polísia Kelikai nia hodi investiga no tortura durante loron rua too loron tolu mak husik fila ba uma.

Aktu ne’e kontra lei no prinsipiu direitu demokrátiku tanba tuir loloos autoridade seguransa sira kaptura ema ruma tuir Notifikasaun tribunal nia no tenke lori ba iha justisa nia oin liu husi tribunal sira la’ós postu Polísia nia mak sai fali tribunal ka halo fali justisa popular iha polísia sira nia fatin.

Forum Estudante Maubere lori asuntu nee ba públiku hodi informa ba públiku atu autoridade legal sira bele halo investigasaun kle’an.

Aktu ne’ebé ekipa operasaun komete nudár krime hasoru umanidade no krime hasoru dalan justisa legal iha Timor-Leste tanba aktu hira ne’e hanesan halo kapturasaun no detensaun arbitraria hodi esklui funsaun tribunal sira.

Ne’e hatudu estadu ditadór no militaristiku la’ós estadu demokrátiku ka estadu harii husi vontade povu nia tuir Konstituisaun RDTL haruka.
.
Notísia kompletu sei iha prosesu elaborasaun, ami sei fahe bainhira finaliza informasaun tomak.
 .