Operasaun FDTL no PNTL hasoru CPD no KRM falha no populasaun sai vitima

,

PNTL obriga tia ne’e ba kee rai kuak hodi buka granada no kilat maibé ikus la hetan buat ida

Fórum Estudante Maubere (FEM) - 24 de Abril de 2014

Operasaun konjunta entre FDTL no PNTL hasoru CPD no KRM durante fulan rua resin sofre fallansu no populasaun sala laek sai tarjetu. Forum Estudante Maubere Operasaun konjunta husi PNTL no FDTL ne’e besik fulan tolu ona maibé seidauk halo kapturasaun ka tiru mate membru prinsipál husi Konsellu Revolusaun Maubere no Konsellu Popular Demokrátiku-RDTL.

Antes ne’e ulun boot sira ba operasaun ida ne’e afirma ba komunikasaun sosiál katak sei kaptura sira ne’ebé deskonfia lori halai kilat ne’e iha tempu badak no laiha kilat ida mak sei tarutu. Maibé too agora seidauk hetan kilat musan ruma iha terrenu, Polísia see pistola ba malu tanba fahe osan operasaun ba malu la hanesan.
,

PNTL obriga tia ne’e ba kee rai kuak hodi buka granada no kilat maibé ikus la hetan buat ida

Depois tiru reijada iha Lalulai dia 10 Marsu 2014 too agora, seidauk iha keixa ruma husi povu kona-ba kilat tarutu iha povu nia leet. Povu sivíl mak sai fali tarjetu ba operasaun ne’e hodi satisfás ba sira nia emosaun no espresa emosaun ne’e liu husi tortura no intimida sira ne’ebé deskonfia involve iha organizasaun KRM no CPD.

Postu PNTL nia sai fatin ba investigasaun. Bainhira kaer ema sira ne’ebé deskonfia la lori ba tribunal hodi hetan lia los maibé lori de’it ba posku polísia no FDTL nia hodi insultu no baku depois husi fila ba uma, sira ne’ebé kaer ona no inan aman sira ne’ebé nia lae ka oan ka maun sira sei sees husi operasaun nee hetan ameasa katak promete loron tolu mak sira nia família ne’ebé sei subar ne’e la entrega an ba autoridade sira mak sei kaer fali sira hodi hatama ba kadeia hodi hein nia família sira entrega an.

Polisia baku labarik ne'e ho kilat iha nia liman

 .

FEM hetan konfirmasaun husi populasaun sivíl ne’e ta’uk atu publika sira naran hateten katak ami ta’uk los tanba ami mak sei simu konsekuénsia husi ami nia família nia opsaun polítika tanba promete loron tolu ba ami mak ami nia família la rende sei kaer ami hodi lori ba kadeia.

FEM preokupadu tebes ho situasaun ne’e tanba aktu ne’ebé PNTL no FDTL hakarak repete fali saida mak rejime ditadura Indonézia nia uluk utiliza ba povu Timor-Leste. Situasaun ne’e akontese ona iha Laga-Boleha hodi aplika ba Sr. Domingos da Costa hodi intimida nia tanba nia aman too agora seidauk prontu entrega an ba autoridade estadu nia.

 Iha Selegua-Sagadate, Bauguia no Kelikai mós ekipa operasaun konjunta ameasa povu ho lia fuan hanesan hodi hata’uk povu. Sera ke ida ne’e tuir rezolusaun nia mandatu? Ka konvensaun direitus umanus, kódigu penal no Konstituisaun nia mandatu hodi família mak tenke hatán fali ba família seluk nia kulpa ne’ebé akuza de’it?

Estadu direitu demokrátiku nia espíritu ida ne’ebé? Media no organizasaun direitus umanus sira presiza uza informasaun hirak ne’e ba konfirma ba povu? Ka ema sira ne’e kondenada kriminál tanba ne’e la merese hetan protesaun ruma? Operasaun ne’e tanba sá la fó espasu ba media no defensór direitus umanus sira hodi hetan informasaun? Triste tebes ba situasaun ida ne’e.

.