"Mediku ONGV Abandona Servisu"

.

Jornal Independente - Segunda-Feira, 07 Abril 2014

Mediku sira ne'ebe servisu iha Opsital Nasional Guido Valadares konsidera abandona servisu, hahalok ne'e identifika sai bainhira Prezidenti Republika Taur Matan Ruak (TMR) halo tratamentu saude iha ONGV, Sabadu (5/4).

 Prezidente Republika sente ninian saude ladun diak, tanba ne'e ba halo tratamentu saude iha Ospital Nasional Bidau, maibe Xefe Estadu la hetan atendementu diak husi servisu saude sira iha ONGV, nune'e, doutor mos laiha fatin, doutor sira foin mai hafoin telefone ba sira.

"Hau sente triste, hanesan sidadaun ita triste tebes tanba ema be numeru um (1) iha ansaun ne'e, nia atendementu hanesan ne'e oinsa ba povu baibain ne'e," lamenta Primeira Dama, Idabel Fereira.

Ne'e duni, Primeira Dama lamenta tebes ho hahalok servisu husi professional saude sira nian, tanba la halo servisu ho efetivu no efisensia hodi abandona ospital iha oras servisu nia laran. Haree ba kestaun ne'e, Diretor Lalenok ba Ema Hotu (LABEH), Julio da Silva Guterres, ezije ba Ministru Saude, Sergio Lobo atu demite urjente Diretor ONGV, tanba hatudu inkapasidade institusional liu husi mal trata ba Prezidenti Republika, Taur Matan Ruak.

Tuir nia, tratamentu ba prezidenti Republika deit hanesan ne'e ona, oinsa ba povu baibain ne'ebe laiha kbiit atu fo influensia iha jestaun ospital nian. Problema atendementu ba moras sira iha ONGV la'os buat foun, husi Prezidenti Republika, deputadu Parlamentu nasional to'o populasaun sira dala barak kestiaona makaas mediku sira nia servisu iha ONGV, maibe seidauk iha mudansa ruma.

To'o notisia ne'e hatuun, Diariu ne'e seidauk halo konfirmasaun ba Diretor Jeral Ospital Nasional Guido valadares, relasiona ho problema ne'ebe akontese.

-