"MECB Ministro Babo Nia Oan Rasik"

.

Jornal Independente - Kuarta-Feira, 02 Abril 2014 

Rejultadu Teste Raan (Deoxyribo Nucleic Acid/Nucleic Acid Deoxyribo) hatudu labarik inosente ho naran inisial MECB ne'e Dionisio da Costa Babo Soares atual Ministru Justisa (MJ) nia oan rasik. 

Antes ne'e, Babo nega labarik MECB la'os nia oan, iha Tribunal Distrital Dili, tanba ne'e babo rasik husu atu halo teste DNA ba sira nain tolu, mak labarik MECB, nia inan Lucia da Costa no Dionisio Babo rasik. 

Tuir rejultadu teste ne'ebe diario ne'e asesu husi centro ba Impressao dijital DNA no Diagnostico husi India mai Tribunal Distritu Dili (TDD), katak labarik MECB nia aman mak Dionisio Babo Soares. Iha karta ne'e, Teste DNA ba halo expozisaun ne'ebe iha ne'e sufisiente atu konklui katak, Primeiru fonte expozisaun C, (Dionisio Babo da Costa Soares) nuudar aman Biologico ba fonte expozisaun B (MECB). 

Segundu katak, fonte expozisaun A (Lusia da Costa), nuudar inan Biologica ba fonte expozisaun B (MECB). Entertantu, kordenador advogadu Instituto Juridico Timor-Leste (IJTL), Secaltina da Conceicao hateten, rezultadu DNA ne'e foti horsehik, (Tersa) iha Tribunal Distritu Dili (TDD) no nia rezultadu hatudu pozitivu. 

"Atu konfirma Lucia da Costa no Dionisio Babo, iha relasaun Biloziku ba labarik MECB," hateten koordenador advogadu Instituto Juridico Timor-Leste, Secaltina, horsehik. Tan ne'e, nia dehan, Luisa da Costa haruka ona pedidu ida ba Tribunal atu haree prosesu DNA, atu nune'e Konsellu Superior haree prosesu DNA, atu nune'e Konsellu Superior Majistratura Juridisial (KSMJ), desidi Juis Internasional foun atu koloka ba Tribunal hodi kontinua kazu ne'e. 

 "Tenke hili juis foun ba prosesu ida ne'e, lalais," hateten nia. Nia mos hatutan katak, Luisa mos halo ona pedidu ba Ministeriu Publiku (MP), atu remata investigasaun kona ba violasaun obrigasaun alimentar ba labarik iha Ministeriu Publiku (MP). 

Tuir lei kodigu penal artigu 225 kona ba la halo tuir obrigasaun alimentar katak, ema ne'ebe iha obrigasaun atu fo alimentu no iha kondisaun atu halo tuir obrigasaun ne'e, maibe la halo tuir obrigasuan ne'e to'o hamosu perigu ba alimentadu atu laiha meiu satisvas nia nesesidade fundamental, maski ema sleuk nia ajuda hadook tiha perigu ne'e, sei hetan pena prizaun to'o tinan 3 ka multa. 

"Luisa aprezenta ona keixa kona ba situasaun ida ne'e, tanba reprezetante labarik nia direitu atu hetan justisa ba ida ne'e, 2013 to'o agora la fo obrigasaun alimentar ba labarik, tuir desizaun Tribunal nian," nia dehan.

,