"Komandu PNTL Suspende Komandante Calistro"

.

Jornal Independente - Kuarta-Feira, 30 Abril 2014

Komandu Polisia Nasional Timor-Leste (PNTL) suspende ona komandante Servisu Investigasaun Kriminal nasional (SIKN) Superitendenti Calistro Gonzaga. 

Komandante Operasaun nasional Superintendenti Xefi Armando Monteiro hateten, Komandante Calistro komandu fo ona suspensaun ba nia durante fulan tolu nia laran, atu nune'e bele konsentra ba nia kazu hodi ba hatan iha Tribunal.

"Ita boot sira mai hare nia la tama ona servisu ne'e signifika suspende ona nia, atu nia bele konsentra ba nia kazu," hateten Armando ba INDEPENDENTE liu husi via telefone, tersa, horsehik.

Tuir nia, suspensaun ba komadante SIKN ne'e hahu kedas iha fulan kotuk (Marsu) no oras ne'e nia la hala'o servisu nu'udar komadante SIKN mak hala'o.

"Ita la'os suspende permanente maibe suspende nia atu nia bele konsentra ba nia kazu se iha Tribunal mak nia la sala nia bele hala'o fali nia servisu hanesan baibain," dehan Armando.

Ministeriu Publiku (MP) akuza komandante SIKN Superitendenti Calistro Gonzaga ho kazu rua mak hanesan nao partisipasaun no abuzu de poder.

Antes ne'e, komandante SIKN Calistro ba ona hatan iha Tribunal Distrital Dili (TDD) hodi tuir primeiru audensia, maibe tribunal hadia fali audensia ne'e to'o agora.

.