"Kandidatu PDHJ, FRETILIN Hakarak Konsensu"

.

Jornal Independente - Tersa-Feira, 15 Abril 2014 

Partidu Opozisaun FRETILIN Konkorda atu halo konsensu ho Partidu Bloku Koligasaun CNRT, PD no Frente Mudansa iha Parlamentu Nasional kona ba kandidatura Provedor Direitus Humanus no Justisa (PDHJ). 

Maski nune'e, partidu haat ne'ebe oras ne'e dadaun okupa uma fukun Parlamentu Nasional ne'e seidauk hetan kandidatu ruma ne'ebe bele konkorda hamutuk. 

 Vise Prezidenti Bancada FRETILIN Francisco Miranda Branco hateten, Bancada FRETILIN husu ba Bancada koligasaun atu haree pesoal ne'ebe priense rekijitu ba votasaun hodi troka provedor sesante Sebastiao Ximenes. 

"Ami husu ba partidu koligasaun sira atu aprezenta kandidatu hodi konsulta atu nune'e ami hamosu konsensu," dehan nia iha uma fukun PN horsehik. 

Nu'udar membru PN, Branco prefere liu atu kandidatu ba PDHJ diak liu mai husi ema ne'ebe iha esperensia servisu iha Komisaun Anti Korupsaun (KAK). Tuir nia, ema sira ne'e bele halao servisu diak bainhira assume kargu PDHJ, tanba iha ona esperensia iha KAK, maski nune'e, deputadu Branco hateten, Kompetensia atu halo nomeasaun ne'e Bankada partidu koligasaun sira. 

Entertantu, Vise Prezidenti bancada PD Adriano Joao hateten, Bancada PD sei hein aprezentasaun kandidatura foun ba PDHJ husi Bancada Boot rua CNRT no FRETILIN, tanba ne'e bancada PD laiha hanoin atu parezenta no fihir kandidatura foun PDHJ troka Provedor sesante, Sebastiao Ximenes. 

 "Ami apoiu deit ba kandidatura foun ne'ebe aprezenta husi partidu boot rua ne'e, se karik prienxe rekizitu ami halo votasaun," dehan nia. Antes mandatu PDHJ nian remata, mandatu servisu ba komisariu no Adjunto Komisariu Komisaun Anti Korupsaun (KAK) nian mos remata ona iha fulan Marsu 2014 liuba, maibe to'o oras nee seidauk iha nomeasaun foun husi PN, tanba eleisaun ba kandidatura sei pendenti hela, halo partidu FRETILIN halo Walk Out, foin lalais ne'e. 

.