"Governu Laiha Planu Dezenvolve Kapital Dili"

.

Zenilton Zeneves

Jornal Independente - Kinta-Feira, 03 Abril 2014

Sosiedade sivil, Luta Hamutuk (LH) konsidera Governu liliu Ministeriu Obras Publiku (MOP) laiha planu no dezenhu hodi konstrui estrada iha kapital Dili, ne'ebe sei fo impaktu ba kualidade obra no gasta osan saugate.

 "Implementasaun obra ne'e laiha konseitu, tanba konstrusaun valeta sira ne'e kiik tebes, bainhira mota tun valeta hirak ne'e bele dura ka lae," dehan koordenador advokasia Luta Hamutuk, Zenilton Zeneves, iha knar fatin, Farol, Dili horsehik.

Tuir nia, valeta iha kolmera no Audian laiha kapasidade atu bele jere udan been, tanba realidade hatudu foun dadauk udan ne'e valeta sira ne'e mora la liu maibe liu fali estrada laran.

 "Ami haree katak, estrada sira ne'ebe hadia ne'e sei aat fali bainhira la rejolve uluk valeta hodi bee halai liu, ne'ebe ami hanoin katak, Governu labele toba mehi hadeer halo obra kedan, ne'e sei estraga osan estadu," dehan Zenilton.

Luta Hamutuk mos la konkorda estrada balun iha Kapital Dili ne'ebe governu foin hadia ho orsamentu tokon U$9, maibe sobu fali hodi halo konstrusuan foun.

Aat liu, nia dehan, tuir deklarasaun Ministeriub Obras Publiku katak, konstrusaun haluhan estrada ho valeta ne'e ho objetivu atu halo enkontru simeira CPLP iha Timor-Leste. Nia dehan, LH konsidera Governu iha mentaldiade ne'ebe ladun diak, tanba halo estrada ho kualidade atu benefia ba povu laos halo estrada hodi simu bainaka CPLP.

Trosu estrada Dili laran hamutuk 10 mak reabilita hodi hetan ba eventu rua (2) importante mak hanesan komemorasaun Restaurasaun Independensia 20 de maiu 2014 no Simeira CPLP ne'ebe sei hala'o iha fulan Jullu tinan 2014.

.