"Governu Laiha Kapasidade Ezekuta OJE 2014"

.

Jornal Independente - Sesta-Feira, 25 Abril 2014 

Ezekusaun Orsamentu Jeral Estadu (OJE) 2014 trimestral husi fulan janeiru to'o Marsu hatudu indikasaun 'Valor mean', tanba jeralmente ejekusaun OJE sei minimu tebes. 

Tuir lei orsamentu jeral Estadu, artigu 8 katak, membru Governu hotu-hotu iha dever atu hato'o relatoriu ezekusaun OJE kada trimestral ba Parlamentu Nasional, Ministeriu ne'ebe aprezenta ona ezekusaun OJE 2014 iha trimestre dahuluk nian mak Ministeriu saude, Ministeriu Edukasaun, Ministeriu Komersiu Industria no Ambiente no Ministeriu Solidaridade Sosial. Prezidenti Komisaun C Parlamentu Nasional Virgilio Marcal hateten, husi relatoriu ne'ebe tama ona, komisaun C Parlamentu Nasional (PN) haree katak, membru Governu sira laiha kapasidade atu halo ezekusaun OJE ho diak. Nia hatutan katak, tuir regra normal ezekusaun orsamentu husi Ministeriu kada trimestral tenke atinji 25 %, maibe, husi Ministeriu hirak ne'ebe tama seidauk atinji tarjetu ne'e. 

 "Ami analiza Ministeriu barak nia ezekusaun OJE 2014 fulan tolu nia laran ne'e barak mak sei ezekuta to'o deit 12%," nia afirma. Haree husi presentazen ezekusaun ne'e, Komisaun C PN konsidera kapasidade ezekusaun orsamentu kada Ministeriu sei minimu tebes. 

Atu evita mossu eruu barak iha ezekusaun orsamentu jeral estadu, iha tempu badak nia laran PN sei konvida tan Ministeriu ne'ebe seidauk mai aprezenta ezekusaun atu mai aprezenta. 

"Parlamentu sei kontinua bolu Ministeriu ne'ebe seidauk mai hodi nune'e parlamentu bele akompania kada Ministeriu nia ezekusaun para lalika mosu tan hanesan OJE 2013," nia afirma. 

Nune'e, deputadu PN sira mos sei halo kontrolu diak liu tan, tanba lei Orsamentu Jeral Estadu (OJE) mos defini klaramente katak, to'o fulan Setembru mak membru governu sira ezekuta la to'o 80%, Parlamentu Nasional sei halo retifikasaun hodi hamenus orsamentu kada Ministeriu nian, tanba konsidera laiha kapasidade ezekuta.

.