"FRETILIN Sai Alternativa Ba Hametin Unidade, Dezenvolvimentu"

.

Jornal Independente - Segunda-Feira, 07 Abril 2014 

Secretariu Jeral Partidu Frente Revolucionariu Timor-Leste Independencia (FRETILIN), Dr. Mari Alkatiri dehan existensia FRETILIN iha rai ida ne'e besik ona tinan 40, tanba ne'e politika prioridade partidu ne'e nian mak atu sai hanesan alternativa ida hodi hmatin unidade, dezenvolvimentu, politika konsensu nasional no seluk tan. 

Iha primeiru Konferensia nasional ba kuadrus no delegadus partidu FRETILIN nian ne'ebe mak hala'o durante loron rua (5-6), iha Sentru Konvensaun Dili (SKD), Dr, Alkatiri hateten, konferensia nasional ida ne'e akontese bainhira partidu istoriku ne'e kompleta tinan 40 nia existensia iha Timor-Leste. 

Alkatiri dehan, hateke ba pasadu to'o ohin loron durante tinan 40 ne'e FRETILIN hahu lidera povu tomak hasoru dezafisu oi-oin. Dezafius oi-oin ne'ebe mak FRETILIN hasoru sai hanesan sasukat ida ba FRETILIN atu hatutan nia moris, hanaruk nia moris, dehan nia. 

"Tinan 40 ne'e naruk tebes, hahu ho funu halo rezistensia, estratejia ho tatika oi-oin para bele nafatin subar an iha etapa oi-oin hodi moris nafatin hanesan FRETILIN, to'o ohin loron atu sai hanesan alternativa ida ba hametin Unidade, haburas dezenvolvimentu no hodi politika konsensu nasional," hateten Alkatiri iha nia diskursu bainhira loke abertura ba konferensia ne'e. 

Iha iventu ida ne'e, Partidu FRETILIN koko atu halibur mos eis membru Comite Central FRETILIN (CCF) hanesan Xanana Gusmao, Abilio Araujo, Rogerio Tiago Lobato, Lucas da Costa, Jose Luis Guterres no seluk tan, tanba sira mos parte ida tinan 40 ida ne'e. 

 "Tinan 40 ita lao dook tebes no it abele dehan bainhira ita hahu ita nia rezistensia ema la fiar ita atu manan povo kiik ida, rai kiik ida, maibe husi tasi mane to'o tasi feto sa'e hamutuk ba foho Matebian no Ramelau, ita rezista duni," katak Alkatiri. 

Nune'e, nia afirma hamutuk ho povu tomak FRETILIN lori demokrasia mai rai ida ne'e. Maske moris ona iha era demokrasia, partidu foun sira moris, maibe sira nia abut mak FRETILIN, no laiha Partidu ida iha Timor-Leste ne'ebe mak nia abut laos husi FRETILIN, tanba ne'e hakarak ka lakohi, sira nia abut mak FRETILIN," dehan Alkatiri. Nia dehan tempu pasadu no agora la hanesan. 

"Tanba ne'e, ohin ita hamutuk iha ne'e para atu hasoru dezafius foun, tanba ita hatene katak ho demokrasia ita restaura ita nia independensia, ita harii fila fali ita nia republika, ita hili nafatin ita nia bandeira nasional ho Ino nasional, mak ita harii sistema ida que la hanesan ona ho uluk, tanba uluk sistema ida para atu halo rezistensia no ohin sistema para halo dezenvolvimentu no seluk tan atu dezenvolve povo no nasaun ida ne'e," tenik Alkatiri. 

"Dala barak poder mak importante liu, poder e nao autoridade estadu, entaun ita lao ba mai advezes ita lakomprende malu, balun hakarak harii estadu ho nia autoridade demokratiku, balun hakarak ezercisiu do poder no lori ita ba konflitu no ita ba tama iha konflitu 2006 tanba kontradisaun ida ne'e," dehan nia. 

Alkatiri mos hatutan, maske nune'e, hotu-hotu mai husi abut ida deit (FRETILIN), objetivu lolos mak ida deit atu servi povu ida ne'e. 

Oras ne'e dadauk Timor-Leste harii ona paz no estabilidade, buat ne'ebe presiza atu halo mak hametin autoridade do estadu no konsolida nasaun. Nia hateten tan, FRETILIN sei lakohi atu buka deit poder maibe hakarak ajuda harii estadu ida ne'e. 

Iha oportunidade ida ne'e, Alkatiri mos koalia kona ba Politika TL iha reijaun ida ne'e. Tuir nia katak, TL nia sorte mak boot liu, tanba iha fatin no jeojrafika ida ne'e entre potensia bobo'ot, maibe ba reijaun ida TL sao alternativa ida ba solusaun entre problemas sira iha mundu. 

Alternativa ba solusaun ekonomia, alternativa ba solusaun finanseira, alternativa ba solusaun politika halo ekilibru ida ba mundu," dehan nia. "Ita tenke aproveita didiak ida ne'e, ita so bele aproveita didiak kuandu it abele dezempena fila fali funsaun ida atu fo ezemplu ba reijaun no mundu tomak," dehan Alkatiri.

.