"Ezekusaun OJE Komisaun B PN La'o La Loos"

.

Jornal Independente -Kuarta-Feira, 30 Abril 2014 

Ezekusaun Orsamentu Jeral Estadu (OJE) 2013 iha Komisaun B Parlamentu nasional (PN) la'o la loos, tanba ezekusaun boot liu husi orsamentu alokasaun ba komisaun ne'e. 

Tuir dadus ne'ebe diariu ne'e asesu katak, alokasaun orsamentu ba Komisaun B PN iha OJE 2013 ba kategoria viazen lokal hamutuk U$926,302 ne'ebe ezekuta deit U$505,340 no ba viajen estranjeiru U$1.962.451, maibe Komisaun B ezekuta to'o U$2.718.739 ne'ebe hamosu divida ba komisaun B PN hamutuk U$756.288. 

Entertantu, membru komisaun B PN, Cesar Valente konfesa katak, hafoin fila husi vizita servisu ba Guine-Bissau, meza eis Prezidenti Komisaun B PN, Maria Lourdes Bessa hateten, orsamentu ba viazen estranjeiru ne'e ultrapasa ona alokasaun orsamentu ba viazen estranjeiru. 

"Dehan ami iha divida, ne'e mak ami husu meza tanba saida mak iha fali divida, maibe sira meza to'o agora seidauk esplika no esklarese baa mi," tenik nia. Tuir nia, informasaun ne'ebe nia rona husi eis Prezidenti Komisaun B PN nia vizita ba estranjeiru iha 2013 ne'e ba nasaun Portugal no Guine Bissau deit laiha tan rai seluk, maibe hasai gastu barak. 

 Eis Prezidenti Komisaun B PN, Maria Lourdes Besa, rekonese iha divida bainhira Komisuan B ba halo estudu komparativu iha Portugal no vizita servisu ba Guine Bissau, tanba membru fiskalizasaun PN nain 4 mak tuir komisaun B PN ba estranjeiru. 

Nune'e, deputada partidu PD ne'e dehan, ezekusaun orsamentu ne'ebe ultrapasa ne'e responsablidade Prezidenti PN no Finansa PN nian, tamba sira soma hamutuk ho alokasaun orsamentu ba Komisaun B PN nian.

,