"Ema Deskonesidu Sunu Rezidensia Komandante PNTL Baucau"

.

Jornal Independente - Tersa-Feira, 15 Abril 2014 

Ema deskonesidu, Sesta (11/04), sunu rezidensia komandante Polisia Distritu Baucau, Superitendenti Xefi Jose Neto Mook nian, akontesementu ne'e mosu kuaze tuku 2 madrogada no la hamosu ema ruma kanek no mate. 

Sasan sira iha uma laran mos la hetan estragus barak tamba ema deskoinesidu ne'e tau gajolina iha fatin be'e "Agua" tuda ba infraestrutura uma no halo ahi ha'an motuk kalen sira molok mate rasik, dehan komandante Neto Mook. 

Nia dehan, akontesementu ne'e mosu bainhira nia involve hela iha operasaun hasoru grupu illegal sira iha terenu. Komandante Neto Mook mos hetan ameasa liu husi telemovel maibe nia lakohi esplika konaba kontiudu liafuan ameasa ne'e. 

"Hau mos hetan ameasa liu husi SMS (Short Mensage Service) hau mos la hatene se mak ameasa hau, akontese liu tiha minutu 10 nia "Miss called" hau, hau telefone fali nia numeru mate hela," dehan Neto Mook, ba INDEPENDENTE liu husi telefone horsehik. 

"Hau entrega dei ba maromak no rai lulik sira, ita la hanoin at ba sira mak sira halo hanesan ne'e la buat ida maibe ami halao hela investigasaun ba kazu ne'e," dehan nia. 

Nia hatutan, nia parte deskonfia ona ema balun ba kazu ne'e maibe sei presiza investigasaun klean ba problema ida ne'e. Entertantu, kona ba situasaun jeral iha Distritu Baucau, nia dehan situasaun kontroladu.

,