"AS Halo Violasaun Seksual Hasoru Vizinu Labrik Ki'ik"

,

Jornal Independente - Tersa-Feira, 29 Abril 2014 

Joven ida ho inisial AS tinan 24 hela iha area Komoro, Domingu (27/4) halo violasaun sexual hasoru ninia vizinu labarik kiik ho inisial JV idade 13. 

Tuir informasaun husi sasin sira ne'ebe servisu Investigasaun Kriminal Nasional (SIKN) rekolla iha terenu katak, iha loron Domingo (27/4), suspeitu AS bolu labarik JV ba iha nia uma laran, liu minutu balun, Vizinu sira rona lian hakilar (husu ajuda) husi suspeitu AS nia uma laran. 

Nune'e, iha vizinu balun mos haree suspeitu AS halo hela violasaun seksual ba vitima JV, entaun vizinu sira ne'e kontaktu Polisia Nasional Timor-Leste (PNTL) hodi mai halo atuasaun hasoru suspeitu AS. 

Hafoin halo kapturasaun, PNTL sira identifika katak, vitima JV hetan ona violasaun seksual husi suspeitu AS. "Ita agora kaer hela suspeitu ne'e no sei detein iha sela polisia eskuadra Komoro," dehan Komandante Interinu SIKN, Manuel Alves, iha Kuartel Jeral PNTL, Kaikoli, Dili, horsehik. 

Nia hatutan, vitima parte Polisia entrega ona ba ONG Pradet hodi bele fo konsellu ba vitima ne'e, nune'e bele halakon traumatiku husi vitima ne'e rasik. 

 "Ita entrega ona vitima ba pradet no agora ita nia parte Polisia komunitariu halo ona atendimentu para oinsa haree ba prosesu ne'e ba oin," dehan Manuel.

,