Tribunál distritál Díli desidi hatama Mauk Moruk ho komandante Labarik bá iha prizaun preventiva

.

SAPO TL ho Lusa- 16 de Março de 2014

  

Tribunál distritál Dili horisehik desidi hatama eis-komandante gerrilha nain rua ba prizaun preventiva tamba tuir investigasaun ne’ebé iha hatudu katak ezisti grupu rua ne’ebé tenta kria instabilidade iha Timor-Leste, haktuir fonte judisial ba lusa. 

“Lori ona arguidu Paulino Gama ho Komandante Labarik bá iha prizaun preventiva”, tenik advogadu defeza hosi eis-komandante nain rua, Paulo Remédios.

 Tribunál deside hatama eis-komandante hosi Brigada Vermella, no hanesan mos líder hosi Konsellu Revolusaun Maubere, Mauk Moruk (Paulino Gama), ho José Santos Lemos, konesidu nu’udar komandante Labarik Maia, no hanesan mos antigu-kombatente Falintil ne’ebé polisia ka’er iha Dili, kinta –feira ne’e bá prizaun preventiva.

Durante sira-ninia audiénsia iha tribunál, hetan seguransa maka’as hosi parte seguransa nian.

Cornélio Gama (L7), eis-deputadu no hanesan mos antigu vise-komandante hosi rejiaun 3 durante luta ba restaurasaun independénsia, no maun hosi Mauk Moruk mos polísia kaer iha kinta-feira liu ba, tamba iha relasaun ho termu identidade no hela fatin, dehan Paulo Remédios.

 Polísia ka’er sira na’in tolu bazeia ba rezolusaun Parlamentu nian tanba tuir rezolusaun ne’ebé iha grupu Konsellu Revolusaun Maubere no Konsellu Populár Defeza Repúblika Timor-Leste (CPD-RDTL) tenta kria instabilidade no ameasa Estadu.

 Líder CPD-RDTL, António Aitahan Matak entrega-aan voluntariamente ba autoridade sira iha sesta-feira ne’e tamba termu identidade no hela fatin, haktuir advogadu defeza. Arguidu 18 seluk hetan liberdade ho termu identidade no rezidénsia, hatutan advogadu Remédios.

Bainhira lusa husu konaba karik sei aprezenta rekursu kontra desizaun ne’ebé iha, Paulo Remédios esplika katak aban maka nia sei simu/hetan “kópia hosi despaxu ne’ebé iha, atu nune bele haree karik iha razaun legál ruma kona-ba medida hothotu no ba rekursu”.

Tuir rezulusaun Parlamentu Konsellu Revolusaun Maubere ho CPD-RDTL viola ona artigu haat hosi Kodigu Penál nian nomós ida hosi Konstituisaun RDTL.

 Artigu 188.º, hosi Kódigu Penál ko’alia kona-ba asosiasaun kriminozu no sei fó kastigu komarka tinan lima rua to’o tinan ualu ba“ema ne’ebé promove ka harii grupu, organizasaun ka asosiasaun ho ninia finalidade ka ninia atividade halo krime”.

Iha artigu 194.º, sei fó pena prizaun tinan ida ka multa ba “ema ne’ebé uza indevidamente kanabuzivamente uniforme, farda, traje ka insígnia ne’ebé identifika aktividade, autoridade ka instituisaun públika ka internasionál hanesan meiu atu pratika ilísitu ruma fasil liu”.

Tuir Kódigu Penál artigu 195.º, sei fó pena prizaun tinan tolu ka multa ba “Ema ne’ebé, maski laiha autorizasaun, ezerse funsaun ka pratika aktu ne’ebé funsionáriu, komandu militár ka forsa ba seguransa públika maka bele pratika, nune’e hatudu-án, expresamente ka tasitamente, hanesan ema ne’ebé iha kualidade ne’e”.

 Iha artigu 202.º, ko’alia kona-ba alterasaun Estadu Direitu no sei fó pena prizaun tinan 15 ba “ema ne’ebé, ho violénsia, ameasa ho violénsia ka insitamentu ba gerra sivíl, buka atu sobu, muda ka domina Estadu tuir-lei ne’ebé konstituisaun estabelese”.

Tuir konstituisaun RDTL pontu 3 hosi artigu 43.º haktuir katak “Iha bandu ba asosiasaun ne’ebé ho kro’at, asosiasaun militár eh paramilitár no organizasaun sira-ne’ebé hakarak defende hanoin eh hato’o hahalok ho karater rasista ka hasoru ema railiur eh haburas terrorizmu”.

Konsellu Revolusaun Maubere eziji atu dissolve parlamentu, hatun governu, hala’o eleisaun, restaura konstituisaun tinan 1975 nian no muda rezimi atuál Timór nian ba rezimi prezidensialista.

CPD-RDTL hanesan grupu ida hosi eis-veteranus hotu-hotu, lidera hosi António Aitahan Matak, ne’ebé depois restaurasaun independénsia halo manifestasaun oioin iha Dili hodi eziji rekonesimentu kona-ba independénsia ne’ebé fó sai iha tinan 1975, nune’e mos husu atu organizasaun hotu-hotu sai hosi Timór.

 ,