Sobu Sede CPD-RDTL Iha Suku 3 "PNTL Atauro Ezekuta Rezolusaun PN"

.

Jornal Nacional Diario - Tersa-feira, 11 Marsu 2014 

Polisia Nasional Timor-Leste (PNTL), Eskuadra Atauro, Kinta (6/2), ezekuta ona rezolusaun no.14/III (2) ne'ebe Parlamentu nasional aprova unamidade hodi fo kbiit ba polisia atu hasai atributu military husi grupu Conselho Popular Demokratico Republika Demokratica Timor Leste (CPD-RDTL). 

 Iha ezekusaun ba rezolusaun ne'e, PNTL Atauro hatun Bandeira RDTL iha Sede CPD-RDTL nian, inklui rekolha hotu kedas atributu military ne'ebe mak membru grupu CPD-RDTL sira uza iha Atauro. 

 Iha operasaun ne'e, Polisia hasai atributu military husi grupu CPD-RDTL iha suku tolu, kompostu husi Suku Maumeta, makadadi, ho Suku Makili. 

 Komandante PNTL Eskuadra Atauro, Inspektur Asistente, Gaspar Ximenes hateten, Polisia eskuadra Atauro halo operasaun ne'e bazeia ba rezolusaun ne'ebe mak deputadu Parlamentu nasional (PN) aprova ho unaminidade. Ba JNDiario iha Atauro, Sesta (7/3), Gaspar Ximenes informa katak, iha operasaun ne'e Polisia konsege rekolha imblema CPD-RDTL, farda military no botas. 

"Ami detekta ona ba ema ne'ebe mak responsabldiade I ami prense ona nia deklarasaun hodi submete ba prosesu investigasaun, no lori ba Ministeriu Publiku atu nune'e bele hata'an iha Tribunal," afirma gaspar Ximenes. 

Antes halo operasaun ba grupu CPD-RDTL, Polisia halo uluk aprosimasaun ho membru CPD-RDTL sira, nunee bele kolabora hodi asegura operasaun ne'e la'o ho hakmatek no susesu. 

.