“Situasaun Iha Laga Hakmatek, Membru CPD 1.702 Rende”

.

Jornal Independente - Kuarta-feira, 12 Marsu 2014

Situasaun Jeral iha Aldeia Lalulai besik Samalari, Sub Distritu Laga, Distritu Baukau oras ne’e rekopera ona hafoin liu tiha operasaun husi Polisia Nasional Timor-Leste (PNTL) hasoru membru Konsellu Revolusaun Maubere (KRM) ne’ebe lidera husi Mauk Moruk no membru Consellu Popular Demokratiku Republika Demokratika Timor-Leste (CPD-RDTL) Xefia husi Antonio Aitahan Matak.

Entertantu, iha fatin seluk, membru CPD-RDTL hamutuk ema nain 1.702 kontinua rende iha Aldeia Akara’e, Suku Uai-Laha, Sub Distritu Venilale, Distritu baucau.

Situasaun hakmatek ne’e tamba hetan apoiu masimu husi autoridade husi Sub Distritu Laga, Distritu Baucau ba operasaun Polisia nian.

Nune’e, komandante operasional Nasional Superitendente Xefi Armando Monteiro hatete, situasaun iha teritoriu TL laran tomak espesial Distritu baucau la’o normal laiha akontesementu ne’ebe mak afeita ba situasuan seguransa nian.

Oras ne’e polisia hamutuk F-FDTL hahu faze de rekoperasaun ba komunidade sira nune’e komunidade labele senti tauk ona.

Aleinde ne’e, membru CPD mos entrega volontariamente sira nia farda hamutuk rua inklui bandeira grupu ne’e nian, iha loron tersa orsehik.

Administrador Sub-Distritu Venilale, Julio Tome da Silva hato’o informasaun ne’e hafoin partisipa iha serimonia entrega farda no hatun Bandeiar CPD-RDTL iha Aldeia Akara’e ne’e mos oras ne’e taka ona, no sira promete sei la halo tan atividade organizasaun nian iha fatin ne’e.

“Iha momentu ne’e, sira entrega farda hamutuk rua deit, hatun bandeira no hasai hotu besi riin bandeira nian, tanba nates ne’e sira nia farda barak mak entrega uluk ona molok rezolusuan ne’e fo sai,” hateten Administrador Julio Tome ba INDEPENDENTE liu husi via-telefone horsehik.

Partisipa entrega farda ne’e mak, hanesan autoridade lokal sira husi Aldeia no suku walu (8), lia nain sira, administrador sub Distritu, PNTL husi eskudra sub Distritu Venilale no komandante PNTL Distritu Baukau.

.