“Provedor Sebastiao Husu Pensaun Vitalisia”

'

Jornal Independente - Sesta-feira, 21 Marsu 2014 

Provedor Direitu Humanus no Justisa Sebastiao Dias Ximenes ho nia adjuntu sira husu atu hetan pensaun mensal vitalisia ba Parlamentu Nasional. 

Tuir karta husi Provedor Direitu humanus no justisa ne’ebe diariu ne’e asesu, numeru ref. 097/PDHJ/III/2014, halo iha fulan Marsu 2014 katak, husu atribuisaun pensaun mensal vitalisia ba provedor ho nia adjuntu sira. 

Karta ne’e hetan reasaun maka’as husi Sosieade sivil sira katak, PDHJ kontra ona konstituisaun Republika Demokratika Timor-Leste, tanba nu’udar instituisaun independente ida husu pensaun mensal vitalisia ba orgaun Estadu Timor-Leste. 

Diretor Ezekutivu Organizasaun Naun Govermental (ONG) Forum, Arseino Pereira lamenta no konsidera provedor hamosu inkonstitusional tanba sira la’os membru orgaun Estadu iha Soberania TL. 

“Hau hanoin karta ne’ebe provedor Direitu Humanus no Justisa hato’o ba Parlamentu Nasional no Primeiru Ministru ne’e inkonstitusional,” dehan Arseino ba INDEPENDENTE liu husi via-telefone horsehik. 

Tuir nia, lei pensaun vitalisia ne’e ba orgaun estadu nian membru sira hanesan Prezidenti da Republika, membru Parlamentu nasional, membru Governu no Tribunal. 

“Ami hanoin katak, provedor Sebastiao (PDHJ) nia ne’e komete erru boot tanba sira mak halo lei maibe sira rasik mak viola fali lei,” nia lamenta. “Ami haree hanesan Komisariu KAK, Prodevor (PDHJ), nunka simu pensaun vitalisia ne’ebe ami haree sira jurista ida maibe labele uza konsensia no poder ba pesoal nia an rasik,” nia informa. 

Areino dehan, osan ne’e povu nian ne’ebe nusa mak la gasta hodi nesesita populasaun Timor-Leste ne’ebe sei kiak no mukit. 

“Ami (ONG Forum) haree katak ne’e komiku oituan tanba ita nia populasaun barak mak kiak no mukit barak maibe sira mos husu pensaun vitalisia,” tenik nia. ONG Forum la konkorda karta provedor hato’o ba PN no Primeiru Ministru tan ne’e ONG Forum liu husi tim advokasia sei halo mos karta ba PN atu lalika fo konsiderasaun. 

“Ami husu ba PN atu kansela no labele fo konsiderasaun tanba kuandu Parlamentu Nasional aprova ne’e hamosu injustisa boot iha ita nia rain no karik Parlamentu konsidera entaun sira mos viola lei,” dehan nia. Iha fain ketak, Diretor Justica Monitoring Programa (JSMP), Luis sampaio hatete, karik PDHJ hetan referensia ruma husi fatin seluk hodi hakarak husu ba Parlamentu Nasional no primeiru Ministru. 

“Hau hanoin sira haree husi intermus politika funsaun publiku nian ne’e funsionariu publiku sir abele hetan pensaun maibe ba pensaun vitalisia ba ema titular hanesan membru PN, Governu, Prezidenti no tribunal, ne’e buat ketak ida,’ dehan nia. 

Nia akresenta, pensaun vitalisia ne’ebe orgaun titular estadu simu kada fulan mos iha lamentasoens iha publiku. “Ida ne’e mos ita husu atu PN reve satan sira (PDHJ) ho hanoin ida ne’ebe konsellu hanesan ne’e, hau hanoin Parlamentu tenke deskute didiak,” tenik nia. 

Maibe, nia dehan, funsionariu publiku iha direitu atu hetan pensaun bainhira hetan ona reforma husi funsionariu (Pensiunan) maibe laos pensaun vitalisia.

.