"PN Lamenta Projetu Emerjensia Governu Xanana"

.

Jornal Independente - Tersa-feira, 11 Marsu 2014 

Hafoin hetan kritika husi Prezidenti republika, agora mai fali preokupasaun husi Uma Fukun Parlamentu nasional neebe kestiona maka'as kona-ba projetu emerjensia husi Governu Bloku Koligasaun (BK) ne'ebe xefia husi Xanana Gusmao. 

Reprezetante povu iha uma fukun Parlamentu nasional lamenta politika kintu Governu konstitusional ne'ebe nakonu ho projetu emerjensia , maibe obra barak laiha kualidade hodi benefisia populasuan sira. Membru bancada PD, Virgilio Hornai, husu ba Governu liu husi Ministeriu obras Publiku (MOP) atu halo avaliasaun ba projeitu emerjensia ne'ebe hasai osan barak, maibe laiha kualidade. 

"Hau hanoin katak projetu emerjensia ne'ebe durante ne'e ita nia governu halo ne'e presiza avalia fila fali, tanba laiha benefisiu ba povu Timor-Leste," dehan nia iha Plenaria PN horseik. 

Tanba tuir nia, natureza ba projetu emerjensia atu halo normalizasuan ba situasaun ne'ebe hasoru dezastre boot. 

 "Saida mak akontese iha ita nia pais, liuliu iha area konstrusaun ita nia governu jeneraliza projetu hotu-hotu ho karakter emerjensia ne'ebe laiha aproveitamentu ba kualidade," nia lamenta. 

Pior liu, nia dehan, projetu emerjensia ne'e afeta tebes ba dupla kustu no la tuir estandar ba faze kualdiade maibe hadia ohin aban aat fali. 

"Ita haree projeitu balun konstrui durasaun tinan ida maibe ho karakter emerjensia nee la diak," nia sujere. 

Iha fatin hanesan deputadu Bancada FRETILIN, Manuel Castro la konkorda governu adopta beibeik projeitu emerjensia ne'ebe laiha kualdiade. 

 "Ita hare governu halo projetu emerjensia daudauk ne'e sei kontinua laiha kualdiade, tamba halo projetu emerjensia ho objetivu ba enkontru simeria CPLP iha tinan ne'e," dehan nia. 

Nia afirma tan, realidade projetu emerjensia durante ne'e laiha kualidade hotu, tanba haree deit projetu emerjensia ba valtea Audian halo hotu la kleur aat fila fali.

.