"Mauk Moruk Rezeita KRM Iha Kilat"

.

Jornal Nacional Diario - Kinta-feira, 13 Marsu 2014 

Prezidenti Konsellu Revolusaun Maubere (KRM), Paulino Gama 'Mauk Moruk' rezeita informasaun Polisia nian ne'ebe fo sai katak Konsellu Revoilusaun Maubere iha kilta hodi tiru hasoru polisia wainhira halo operasaun iha lalulai. 

"Ami laiha kilat hanesan sira, ami iha kilat karik Batalhaun hira ka polisia sira iha ne'eba ne'e sira la sai, sai la diak husi ne'eba iha altura ne'eba, ami laiha kilat, ami hasoru ho katana, ho tudik, ho diman ho fatuk, buat sira ne'e mak ami hasoru iha momentu ne'eba,' Mauk Moruk hateten lia hirak ne'e liu husi Konferensia ba imprensa ne'ebe halao iha sede KRM iha fatuhada, Dili, KUarta (12/3). 

Eis komandante Brigada vermelha ne'e hateten, akontesementu ne'ebe akontese iha lalulai, Laga, katak Polisia Nasional Timor-Leste (PNTL) sira mos tiru kilat musan barak iha area refere halo populasaun trauma. Mauk Moruk mos dun membru Polisia sira estraga hotu tiha fatin ba kooperasaun nian, inklui estraga uma no estraga sasan komunidade nian. 

"Imi hatene ona ida ne'e kanek ka saida ne'e, ne'e hau hatene hanesan ne'e, informasaun to'o mai hau, ida hasai bandeira ne'e ita nia ida sa'e ba taa nia, ida polisia xefi ida hatudu kilat ba ita nia kamarada sira mas depois labarik sira baku liman, basa liman entaun nia kaer Granada kabuar ida, nia dehan imi hatene ida ne'e ga lae? entaun nia deskabila tiha seguransa hasai tiha entaun matebian sira kala saida buat ne'e monu tun rabenta, nia atu simu fali mas rabenta ona, tamba ne'e mak ida kanek ne'e, buat ne'e hau nia parte mas sira dehan sira la tiru ne'e sira bosok, 'ribuan peluru' (katusu musan) mak sira tiru iha ne'eba, arma sira ne'ebe mak sira uza iha ne'eba ne'e sira tiru hotu, hanesan kilat Uzi Izrael sira nian, MPR5, FNC3, Kronia lipat Indonesia sira nian Sater Australia sira nian," Mauk Moruk dehan. 

Iha momentu ne'eba mos sira taka dalan ubliku parte Laga ba baguia nian, nune'e mauk Moruk rekonese katak taka dalan para inkorola polisia sira maibe iha momentu ne'eba parte FALINTIL-Forsa Defeza Timor-Leste (F-FDTL) no Bombeiros mak fo apoiu hodi loke dalan ba area refere nian hodi hasai Polisia sira. Implementasaun rezolusaun ne'e, Mauk Moruk hateten nia sei hein iha nia fatin no ba ema hotu hodi koalia tanba ne'e nia hateten nia sei la hakfodak no la tauk. 

Mauk Moruk mos husu ba PNTL atu labele halo sala tan no halo dezastre hasoru nia membru sira, se wainhira ida ne'e akontese tan justisa sei kona hotu. 

"Kuandu imi mak sala iha buat ruma tan, sadik tan ou desserse tan ne'e loron ida justisa mos monu iha imi nia leten, hau hakarak deklara ba imi, hau hadomi imi mas tau loloos," dehan nia. 

Relasiona ho akontesementu ne'ebe rejulta membru Polisia nain rua (2) kanek, no polisia mos kaptura membru mauk Moruk nian nain 2 ne'ebe detein iha PNTL Distritu Baucau, Mauk Moruk hateten, oras ne'e dadauk nia advogadu halo ona esforsu tomak hodi liberta nia membru ne'ebe mak Polisia Distritu baucau detein ne'e. 

 Iha oportunidade ne'e mos Mauk Moruk afirma, nia advogadu sira lori ona kazu ne'e ba Tribunal no hein tempu para halo julgamentu. Alende ne'e mos nia husu ba Polisia Distritu baucau hodi husik nia membru sira ne'ebe mak Polisia kaptura iha Distritu Baucau.

.