LIAN HUSI LAGA

.

Timor Hau Nian Doben - 21 de março de 2014

Liu tiha operasaun iha Laga Lalulai no kaer tiha Mauk Moruk, PNTL hamutuk ho F-FDTL okupa hikas fatin konsentrasaun Konsellu Revolusionariu Maubere Iha Lalulai Laga.

Agora daudaun forsa rua ne’e kontinua hela iha Lalulai hodi halo sosializasaun ba rezolusaun ne’ebe PN hasai kona ba ilegalidade husi organizasaun KRM iha suku sira parte husi Laga nia.

Tuir xefe do Suku Samari katak, Membru Konsellu Revolusionario maubere iha Laga Saelari hamutuk ema tolu nulu mak entrega ona fardamentu militar ba PNTL no F-FDTL.

 Orseik 19 lorokraik PNTL hamutuk ho F-FDTL kontinua halo sozializasaun ba suku Sagadate ne’ebe besik mos iha fatin konfrtontasaun ne’e.

Maske membru husi KRM ne’e rekonese an no entrega fardamentu militar nia ne’ebe durante sira uza ba PNTL maibe PNTL la kaer sira hodi lori ba prosesu justisa tuir kondenasaun sira ne’ebe PN fo liu husi Rezolusaun parlamentar ne’e.

Tuir planu iha dia 20 marsu agora PNTL no F-FDTL sei kontinua halo sosializasaun iha Suku Samalari Laga hodi husu membru Konsellu Revolusionariu tenke entraga fardamentu militar nia ba autoridade kompetente,Xefe Suku Samalari haktuir katak seidauk iha informasaun too agora, membru husi KRM mak atu entrega an ba PNTL iha suku ne’e.

Tuir xefe suku ne’e mos hatete katak depois halo tiha sosializasaun mak membru KRM la entrega an hotu mak sei halo operasaun.

Tuir Populasaun ida iha Lalulai haktuir katak Polisia sira iha ne’eba halo abuzu poder hodi insulta povu no labarik sira, husu ba tia ferik dehan katak “imi atu lori aihan ba membru Konsellu Revolusionariu Maubere? Depois husu halo pasa revista ba populasaun balun ne’ebe atu ba toos no natar. Hateten mos ba labarik sira katak imi nia aman sira halai hotu ba ne’ebe? Mangame ami soe hotu imi ba ponte okos”.

Populasaun sivil sira iha Lalulai “husu ba jornalista no organizasaun direitu umanus sira atu tau matan mos ba atividade povu nia iha fatin refere duke hasai deit ba publiku informasaun husi PNTL no F-FDTL nia operasaun”.

Ami tenke fo sai ba media no organizasaun dirietus umanus sira katak ami presiza kobertura permanente tanba ami haree situasaun agora iha potensia ba violosaun direitus umanus tanba ami rona katak depois halo sosializasaun ne’e mak membru husi KRM la entrega an mak sei halo operasaun boot tuir eskala militar nia.

Ami laiha problema ho operasaun ne’e maibe automatikamente sei afeta baa mi nia atividade loron-loron nia.

Dala ida tan media no Direitus umanus atu tau matan baa mi.

.