“Indonezia Fo Pena Morte Ba Estudante Timor-Oan, Governu TL ‘Hiit Liman”

.

Jornal Independente -Sesta-feira, 21 Marsu 2014

Governu Timor-Leste labele halo buat ida hodi defende netik ninia sidadaun iha Indonezia ne’ebe mak hetan ameasa pena morte husi Tribunal Indonesia tanba komete krime omesidu iha Indonesia.

Tuir informasaun, Tribunal Indonesia ameasa fo pena morte ba estudante nain 6 ne’ebe envolve iha kazu asaltu malu hodi hamate Estudante Universitas Narotama, Ismenio Boy Algerio da Silva (24) no estudante ITATS Uvaldo do Anjos (22).

Suspeitu nain 6 mak, Mariano Vicente, husi Jl Timur Raya Asrama Yinif 743 Kupang, Joao Niko Vernandes, husi JL Naibonat Kupang, Joao Afonso Ribeiro da silva sauda Peirere, husi Suku Bidau Dili Timor-Leste, Aldino Vera Kay Putih, Mateus Viana no Alberto de Araujo Reis.

Tuir advogadu, suspeitu nain neen ne’e kontra KUHP Indonezia artigu 340 ho ameasa pena morte, ni subsidariu artigu 338 KUHP ho ameasa tinan 15 kadeia.

Estudnate nain neen ne’e, iha tersa (8/10/2013) halo torturasaun ba estudante Timoroan, Ismenio Boy Alergi Gonzaga Amonaldo Silva (24) no Ubaldo do Anjo Guterres (22) iha Klampis Semalang II Sukolilo.

Relasiona ho amesa pena morte ba estudnate Timor-oan sira ne’e, Governu Timor-Leste labele halo buat ruma hodi defende ninia sidadaun.

Vise Primeiru Minsitru Fernando La sama de Araujo, deklara pena morte ne’e hanesan konsekuensia tanba iha duni indikasuan katak estudante hirak ne’e komete duni krime.

“Ne’e resiko karik hasai ema seluk nia vida, Indonezia nia lei mak hanesna ne’e,” Hateten La sama iha Palasio Governu horsehik.

Nia dehan, Governu Timor Leste laiha kompetensia atu halo negosiasaun ruma ho governu Indonesia hodi hakmaan pena ne’ebe estudante sira hetan.

La Sama dehan, Governu Timor-Leste respeita lei ne’ebe mak vigora iha nasuan Indonesia.

“Kazu ne’e akontese iha ema nia rai (Indonezia), aplika tuir lei Indonezia nian, sansaun saida mka fo ita pronto simu, ita tenki respeirta lei rai ida-idak nian, kuandu krime ne’e akontese iha ne’eba,” dehan nia.

 .